Böyük Kilikiya Evinin katolikosu I Aramın Moskva və Bütün Rusiyanın Patriarxı Kirill ilə Astanada keçirilən görüşü Azərbaycana qarşı siyasi təxribata xidmət edib.

Dünya və Ənənəvi Dinlər Liderlərinin VIII Qurultayında iştirak etmək üçün Qazaxıstana dəvət olunan I Aram və Patriarx Kirill tədbirin mövzusundan daha çox Azərbaycanda erməni separatizminin bərpasının vacibliyini müzakirə ediblər.

Hətta I Aram Patriarx Kirili özünün siyasi şovinizminə qoşması azmış kimi, Rusiya Prezidenti Vladimir Putindən də kömək istəyib. Belə ki, dini liderlər Qarabağın Azərbaycan tərəfindən “zəbt edilməsi”, Azərbaycandakı erməni kilsələrinə və tarixi abidələrinə və mədəni irsinə münasibət, eləcə də Bakıda həbsdə olan hərbi cinayətkarları ilə bağlı vəziyyəti müzakirə ediblər.

Hətta I Aram və yaxın dostu Patriarx Kirill Qarabağı “Artsax”, Bakıda məhkəməsi gedən hərbi cinayətkarları isə “Artsax” siyasətçiləri və ictimai xadimləri” adlandırıblar.

Erməni kilsəsinin Azərbaycana qarşı terrorçuluğa və separatizmə dəstək verdiyini nəzərə alsaq, I Aramın bu təxribatçı hərəkəti yol verməsi gözləniləndir. Qəribə görünən Rusiya Patriarxının bu məsələdə düşmən “dəyirman”ına su tökməsidir.

Katolikos Kirilə və Prezident Putinə müraciət edərək Patriarx Kirildən Azərbaycan rəsmi dairələri ilə danışıqlarda “Artsax”ın dini və mədəni irsinin təhlükəsizliyinin təmin edilməsi, habelə erməni məhbusların vaxtından əvvəl azad edilməsi üçün lazımi səylər göstərməsini xahiş edib.

I Aram bildirib ki, Patriarx Kirill buna nail olsa, erməni xalqı ona dərin minnətdar olacaq.

Maraqlıdır, Rusiya Patriarxının Azərbaycandan belə bir xahiş etməyə haqqı varmı? 30 il davam edən işğal dövründə Azərbaycana məxsus dini abidələrin dağıdılmasını bir dəfə qınamayan Kirill indi hansı erməni mədəni irsindən və abidəsindən danışır?

Əgər ona maraqlıdırsa, buyurub baxa bilər. Qarabağda nə bir erməni kilsəsi dağıdılıb, nə də bir məzarlıq. Separatçı rejimə məxsus qondarma parlament və ya nazirlik binasının sökülməsi isə nə mədəni irsdir, nə də abidədir. Ancaq işğal dövründə ermənilər məscidləri tövləyə çevirəndə, alban kilsələrindən silah anbarı kimi istifadə edəndə, həmin kilsələrin üzərinə saxta xaçlar vurub öz adlarına çıxanda nədənsə Rusiya Patriarxı susmağa üstünlük verirdi.

Kirill onu da bilməmiş deyil ki, ermənilər yalnız azərbaycanlılara məxsus məzar daşlarını dağıtmayıb, həm də dəfn olunmuş insanların qalıqlarını belə çıxararaq təhqir edib. Rusiya Patriarxı azərbaycanlı olduğuna görə mülki əhaliyə qarşı soyqırım törətmiş, etnik təmizləmə aparmış canilərin azadlığa buraxılmasını hansı haqla təmin edə bilər? Nə Kirilin, nə də Rusiya Prezidentinin bu məsələdə Azərbaycanın daxili işlərinə qarışmaq səlahiyyəti yoxdur.

Hər iki dini liderin görüşməsinin pərdəarxası məqamlarına diqqət yetirsək, bu təxribatçı müzakirələrin səbəbi aydın olar. Erməni Apostol Kilsəsinin katalikosu II Qareginə xaç atalığı edən I Aram görünür, Nikol Paşinyan hökuməti ilə mübarizədə Patriarx Kirildən dəstək istəyib.

Hər iki tərəf Nikol Paşinyanın hakimiyyətdən devrilməsində, sülh prosesinin pozulmasında və münaqişənin yenidən bərpasında maraqlı görünür. Ona görə də Kiril I Aramın müraciətini məmnuniyyətlə qəbul edib.

Müşfiq Abdulla
“Cebheinfo.az”