Azərbaycanda son aylarda ətin qiymətləri sürətlə artmaqdadır. Xüsusilə mal və qoyun ətində müşahidə olunan bahalaşma həm satıcıların, həm də alıcıların narazılığına səbəb olur. Ətin qiymətinin artması gündəlik bazarlıq edən vətəndaşların ailə büdcəsinə ciddi təsir göstərir. Məsələn, son bir ayda hər həftə mal ətinin qiymətində 50 qəpik artım müşahidə olunub. Beləliklə bir ayda 2 manat bahalaşma baş verib.

Redaktor.az keçirdiyi sorğuya əsasən xəbər verir ki, sakinlər də bu artımdan narahatdırlar.

Şəhər sakini Rauf Məmmədov deyir ki, əvvəllər həftədə iki-üç dəfə ət alırdılar, amma indi qiymətlər o qədər qalxıb ki, yalnız bayram və xüsusi günlərdə ət almağa məcburdurlar: "Bir kiloqram mal ətinin qiyməti demək olar ki, hər bazar günü dəyişir. Maaşımız isə eyni qalır. Ətin qiyməti bu tempdə qalxsa, biz ət yeməyi tamamilə unutmalı olacağıq".

Sevinc Quliyeva isə bildirir ki, artım təkcə ətə deyil, toyuq və digər məhsullara da təsir edir: "Ətin bahalaşması süfrəmizdə də dəyişiklik yaradıb. Uşaqlar ət istəyir, amma büdcəyə görə hər dəfə ala bilmirik. Məcbur qalıb daha çox makaron, kartof kimi ucuz yeməklərə üstünlük veririk".

Mövzu ilə bağlı Redaktor.az-a açıqlama verən iqtisadçı ekspert Akif Nəsirli bildirdi ki, ətin qiymətinin artmasının bir neçə paralel səbəbi var və bunlar həm qlobal, həm də yerli amillərlə bağlıdır:

"Yem xərcləri bahalaşıb. Mal-qaranın yediyi arpa, qarğıdalı, yonca və s. yem məhsulları həm idxaldan, həm də daxili bazardan asılıdır. Son illərdə bu məhsulların qiyməti artdığı üçün ətin maya dəyəri də yüksəlib. Heyvandarlıq təsərrüfatları azalıb. Bəzi kəndlilər və fermerlər gəlirlərin azlığına görə heyvandarlıqla məşğul olmaqdan çəkilirlər. Bu da bazarda təklifin azalmasına gətirib çıxarır. İdxaldan asılılıq var. Azərbaycanda heyvan yemlərinin, dərmanlarının, bəzi cins heyvanların idxalı mövcuddur. Valyuta kursundakı dəyişikliklər və xaricdəki bahalaşma daxili bazara da təsir edir. Əhali gəliri artdıqca, həmçinin toy, mərasim və bayram dövrlərində tələbat yüksəldikdə qiymətlər qalxır. İqlim dəyişiklikləri və quraqlıqlar səbəbindən dünyada otlaq və yem məhsullarının istehsalı azalır, bu da beynəlxalq bazarda yem qiymətlərini qaldırır".

Ekspertin sözlərinə görə, enerji daşıyıcılarının bahalaşması da ətin qiymətinə təsir göstərir.

"Neft və qazın qiyməti qalxdıqda daşınma və istehsal xərcləri artır. Qlobal ərzaq böhranı müşahidə olunur. Son illərdə taxıl və yem bazarındakı dalğalanmalar ət qiymətlərinə birbaşa təsir göstərir. Bəzən tacirlər və vasitəçilər “qiymət qalxır” gözləntisini bazara tez ötürürlər. Bu da real xərclər sabit qalsa belə qiymətlərin süni şəkildə artmasına səbəb ola bilir. Eyni zamanda Azərbaycan əhalisinin ətə olan tələbatının yarıdan çoxu idxal hesabına qarşılanır. Yəni bu seqment idxaldan aşırı asılıdır. Nəticə etibarilə, ətin bahalaşmasının əsas səbəbləri yem qiymətlərinin yüksəlməsi, örüşlərin azalması, təklifin daralması və idxal asılılığıdır", - deyə Akif Nəsirli bildirdi.