Xəbər verdiyimiz kimi, Azərbaycan Mərkəzi Bankının iyulun 4-nə olan rəsmi məlumatına əsasən, 1 troy unsiyası qızılın qiyməti 5 680,42 manata yüksəlib.
Son günlərdə müşahidə olunan bu artım tendensiyası bazarda ciddi maraq doğurub. Mütəxəssislər yaxın dövrdə qızılın qiymətində davamlı artımın mümkünlüyünü istisna etmir.
Bəs bu vəziyyətdə yerli əmanətçilər necə davranmalıdır?
Mövzu ilə bağlı “Cebheinfo.az”-a açıqlamasında “Azərbaycan Zərgərlər Assosiasiyası” İctimai Birliyinin İdarə Heyətinin sədr müavini, “Qiymətli metallar və qiymətli daşlar” üzrə Texniki Komitənin sədri Rövşən Əmircanov bildirib ki, hazırda qızılın qiymətində müşahidə olunan artım tendensiyası əsasən ABŞ-də büdcə kəsirinin dərinləşməsi ilə bağlı narahatlıqlardan qaynaqlanır:
“ABŞ-də büdcə kəsirinin dərinləşməsi ilə bağlı artan narahatlıqlar fonunda qızılın qiymətində yüksəliş tendensiyası davam edir. Donald Trampın vergi və dövlət xərcləri haqqında qanun layihəsini təsdiqlənməsi bu narahatlıqları daha da artıraraq, qiymətli metallara olan tələbi gücləndirib.
Eyni zamanda, 9 iyul tarixində qüvvəyə minməsi gözlənilən yeni tarif qərarları və ABŞ-ın ticarət siyasəti ətrafında yaranmış qeyri-müəyyənlik də qızılın mövqeyini möhkəmləndirir.
Nəticə etibarilə, sarı metal (qızıl) son bir həftə ərzində 2 faizdən çox bahalaşaraq əvvəlki həftə İsrai-İran atəşkəsi səbəbindən baş vermiş qiymət itkilərini qismən kompensasiya edib. Bütün bu şəraitdə investorların bir çoxu səhmlərə əlavə vəsait yatırmaqdan çəkinirlər”.
Ekspert uzunmüddətli perspektivdə də bahalaşmanın davam edə biləcəyini qeyd edir:
“Qısamüddətli dövrdə qızılın qiymətini artıran əsas amillər ABŞ-də dərinləşən büdcə kəsiri, dolların nisbətən zəifləməsi, ən böyük bankların alışlarını davam etdirməsidir.
Hazırda London əmtəə birjasında bir unsiya qızıl 3 334–3 345 ABŞ dolları (təxminən 5 670–5 690 manat) arasında ticarət olunur. 9 iyulda tarif qərarının qüvvəyə minməsi, eləcə də ABŞ inflyasiya və məşğulluq göstəriciləri kimi makro xəbərlər yaxın həftələrdə qiymətdə dalğalanmanı artıra bilər. Lakin əsas trend hələ də yuxarı yönlüdür.
Uzunmüddətli dövrdə qızılın bir unsiyasının 3 400 – 3 600 ABŞ dolları diapazonuna qədər bahalaşmaq potensialı saxlanılır. Tarixi nisbətlərə görə hazırda nisbətən ucuz görünən gümüş (təxminən 37 ABŞ dollar) və platin (təxminən 1 395 ABŞ dollar) də portfeli genişləndirmək üçün alternativ olaraq nəzərdən keçirilə bilər”.
Rövşən Əmircanov vurğulayıb ki, qiymət artımı fonunda əmanətçilər ehtiyatlı davranmalıdır:
“Nəticə olaraq, qızılın qiymətinin uzunmüddətli dövrdə artmağa davam edəcəyi gözlənilir. Amma yaxın günlərdə qiymətlərdə dalğalanmalar, yəni həm artım, həm də enişlər mümkündür.
Bu səbəbdən əmanətçilər qızılı qabaqcadan düşünülmüş şəkildə almalı, bütün vəsaiti bir anda sarı metal yatırmamalıdırlar. Daha məqsədəuyğun olanı, yatırımları tədricən həyata keçirmək və yalnız sərbəst vəsaitlərdən istifadə etməkdir.
Belə yanaşma həm gəlir əldə etməyə, həm də bazardakı dəyişikliklərə uyğun reaksiya verməyə imkan yaratdığı üçün daha məqsədəuyğun hesab olunur”.
