"Məmurlar, dövlət qurumlarının nümayəndələri xalqla bir yerdə olmalıdırlar, onların qayğıları ilə yaşamalıdırlar, kobudluğa, yekəxanalığa yol verilməməlidir. Bəzi hallarda yekəxanalıq müşahidə olunur, bəzi hallarda məmurlar özlərini çox təkəbbürlü aparırlar. Buna yol vermək olmaz. Siyasi mədəniyyət olmalıdır və insanlara hörmətlə yanaşmaq lazımdır. Deyə bilərəm ki, əksər hallarda biz müsbət mənzərə görürük. Ancaq mənfi mənzərə ilə üzləşəndə tədbir də görülür, məmurlar cəzalandırılır. Etimadı doğrultmayan məmurlar bundan sonra da cəzalandırılacaqlar.
Hər dəfə icra başçılarını işə təyin edərkən mən onlara öz sözlərimi deyirəm: Gedin təmiz işləyin, xalqla bir yerdə olun, rüşvətxorluqla məşğul olmayın, dövlətə, müstəqilliyə sadiq olun. Budur mənim tələblərim, əsas tələblərim. Hər yerdə belə olmalıdır. Çünki bir daha demək istəyirəm ki, Azərbaycanın inkişafı və ictimai-siyasi vəziyyətin müsbət istiqamətdə inkişafı bütün dünyada gedən böhranlardan asılı olmayaraq, bizim böyük sərvətimizdir". Bu sözləri yanvar ayının 26-da "2014-2018-ci illərdə sosial-iqtisadi inkişafı Dövlət Proqramı"nın icrasının birinci ilinin yekunlarına həsr olunan konfransda prezident İlham Əliyev söyləyib. Qeyd edək ki, ölkə başçısının bu iradlarından sonra bəzi icra başçılarının gələcək karyerası üçün ciddi təhlükə yaranıb. Keçən ay üç icra başçısının yerinin dəyişdirilməsi kadr islahatlarının anonsunu verdi. Etibarlı mənbələrdən əldə etdiyimiz bilgilərə görə, xalqla yaxşı işləməyi bacarmayan və vəzifədən çıxarılması an məsələsi olan icra başçılarından biri də Neftçala Rayon İcra Hakimiyyətinin başçısı İsmayıl Vəliyevdir. Nəzərinizə çatdırmaq istəyirik ki, adıçəkilən məmurun fəaliyyətindəki boşluqlar, rayonda yaşanan acınacaqlı vəziyyətlə bağlı mətbuatda dəfələrlə silsilə tənqidlər dərc olunub. Amma buna baxmayaraq, icra hakimi qanunsuz əməllərindən əl çəkmir ki, çəkmir. Məlumat üçün bildirmək istəyirik ki, Vəliyev İsmayıl Məhərrəm oğlu 31 oktyabr 1959-cu ildə Gəncə şəhərində anadan olub. 1981-ci ildə Bakı Dövlət Universitetini bitirib, əmək fəaliyyətinə 1981-ci ildə Əli Bayramlı (indiki Şirvan şəhəri) şəhər Xalq Deputatları Sovetinin İcraiyyə Komitəsində ümumi şöbənin müdiri kimi başlayıb. 29 may 1996-cı il tarixdən 21 may 1998-ci il tarixədək Sumqayıt Gömrükxanasının rəisi, 21 may 1998-ci il tarixdən 21 yanvar 1999-cu il tarixədək Gömrük Komitəsi sədrinin müşaviri, 21 yanvar 1999-cu il tarixdən 03 yanvar 2001-ci il tarixədək Dövlət Analitik Şöbənin rəisi, 03 yanvar 2001-ci il tarixdən 31 may 2005-ci il tarixədək Gömrük Nəzarətinin Təşkili İdarəsinin rəis müavini vəzifələrində işləyib. 2005-ci ildən Qobustan RİH-in başçısı olub. 26 aprel 2011-ci il tarixdən isə Neftçala rayonuna rəhbər təyin edilib. Apardığımız araşdırmalar göstərir ki, İsmayıl Vəliyev icra başçısı postuna təyin olunandan indiyə qədər yerli əhalinin ümidlərini doğrultmağı bacarmayıb. Belə ki, onun adı dəfələrlə müxtəlif maliyyə maxinasiyalarında, tender fırıldaqlarında, eləcə də sakinlərin heç bir səbəb olmadan incidilməsi ilə bağlı məsələlərdə hallandırılıb. Xatırladaq ki, bir müddət əvvəl Neftçala rayonunda müxtəlif işlərin həyata keçirilməsi məqsədilə elan edilmiş tenderlər vasitəsi ilə yüz minlərlə manatın mənimsənildiyinə dair sənədlər ortaya çıxıb. Yayılan məlumata əsasən icra başçısı İsmayıl Vəliyevin nəzarəti altında həyata keçirilən proses zamanı külli miqdarda vəsait təyinatı üzrə xərclənməyib. "Təhsil Nazirliyinin Neftçala rayon Təhsil Şöbəsi üçün digər maşın və avadanlıqların satın alınması üçün elan edilmiş tenderə 9223 manat pul ayrılıb. Həmin prosesi isə "Günay-T" MMC şirkəti həyata keçirib. Nazirliyin Təhsil Şöbəsi üçün bərk inventarların satın alınması üçün elan edilmiş tenderi isə "Konral" MMC həyata keçirib. Bu məqsədlə 239860,96 manat pulun aqibəti sual altına düşüb. Bundan başqa, Təhsil Nazirliyinin şöbə üçün dəftərxana ləvazimatlarının satın alınması üçün elan edilmiş tenderə isə 5000 manat sərf olunub. Bu prosesi də fiziki şəxs Sadıqov Şəhriyar Ağamalı oğlu vasitəsi ilə həyata keçiriblər. Şöbə üçün mətbəə xidmətlərinin satın alınması üçün də elan edilmiş tenderin qalibi Şəhriyar Sadıqov olub. Bu dəfə ortalıqda 10 min manat pul olub. "Sair xərclər" maddəsi üzrə malların (işlər və xidmətin) satın alınması üçün işlər isə "Təmir-Bərpa" MMC-yə həvalə edilib. Ayrılan məbləğ isə 96942 manat təşkil edib. Neftçala Rayon İcra Hakimiyyəti başçısının Xıllı qəsəbə inzibati ərazi dairəsi üzrə İcra Nümayəndəliyinə dəftərxana ləvazimatlarının alınması məqsədi ilə 2900 manat pul ayrılıb ki, bu iş də Şəhriyar Sadıqov tərəfindən həyata keçirilib. M.Səfərov adına Neftçala şəhər internat ümumtəhsil orta məktəbi Sair xərclər maddəsi üzrə malların (işlərin və xidmətlərin) satın alınması işləri isə fiziki şəxs Qəfərov Qismət Tahir oğluna tapşırılıb. Bunun üçün isə 6000 manat pul ayrılıb", deyə məlumatda qeyd olunub. Əldə etdiyimiz digər məlumatlarda rayonda mövcud olan sosial problemlərdən söhbət açılır. Qaynağımızın iddiasına görə, abadlıq işləri yalnız rayonun bəzi mərkəzi ərazilərində həyata keçirilməkdədir: "Rayon mərkəzindən aralıda yerləşən kəndlərdə vəziyyət olduqca acınacaqlıdır. Kəndarası yolların böyük hissəsi istifadəyə yararsız hala düşüb. Mavi yanacağın, elektrik enerjisinin və içməli suyun fasilələrlə verilməsi insanlara əlavə problemlər yaradıb. İsmayıl müəllim camaatın problemini həll etmək əvəzinə, öz biznesini inkişaf etdirmək barədə fikirləşir. O Neftçalaya icra başçısı təyin olunanda maliyyə imkanları elə də geniş deyildi. Amma indi böyük sərvətə sahibdir. Heç kimə sirr deyil ki, Neftçala camaatının əsas dolanışıq yeri balıqçılıq təsərrüfatındandır. Rayon rəhbəri bu işlə məşğul olan insanlara süni əngəllər yaradır. Dənizə girən hər bir şəxs başçının hörmətini xüsusi olaraq çatdırmalıdır. Əks təqdirdə həmin adamların balıq ovlamasına imkan verilmir". Mənbənin məlumatında qeyd edilir ki, prezidentin sonuncu konfransdakı məlum tənqidlərindən sonra Neftçala camaatında ruh yüksəkliyi yaranıb: "Yerli əhalinin böyük əksəriyyəti icra hakiminin işdən azad ediləcəyini səbirsizliklə gözləyir. Artıq Neftçala camaatı İsmayıl Vəliyevin özbaşına əməllərindən təngə gəlib. Onlar başçının qanuna sığmayan hərəkətləri haqda yuxarılara dəfələrlə şikayət məktubu ünvanlayıblar. İcra başçısının gələcək karyerası ilə bağlı yaxın günlərdə yekun qərarın veriləcəyi gözlənilir. İsmayıl Vəliyev yola salınmağa çox yaxındır". Verilən məlumata görə, özünü çox təkəbbürlü aparan məmurlardan digəri Ağstafa Rayon İcra Hakimiyyətinin başçısı Quliyev Məhərrəm Böyükağa oğludur. Qeyd edək ki, o 13 aprel 1968-ci ildə Lənkəran rayonunda anadan olub. Azərbaycan Kənd Təsərrüfatı Akademiyasını bitirib. Lənkəran rayonunda aqronom, rayon Torpaq şöbəsində mütəxəssis və müdir, 2003-cü ildən isə Lənkəran Şəhər İcra Hakimiyyəti başçısının müavini, 2006-cı ildən Azərbaycan Respublikası Prezidentinin Administrasiyasının Regional idarəetmə və yerli özünüidarəetmə orqanları ilə iş şöbəsinin baş məsləhətçisi vəzifəsində işləyib. Prezidentin 01 iyul 2011-ci il tarixli sərəncamı ilə Ağstafa Rayon İcra Hakimiyyətinin başçısı vəzifəsinə təyin edilib. Son günlər Məhərrəm Quliyev bəzi mətbuat vasitələrində möhkəm şəkildə "vurulmaqdadır". Məsələn, bir müddət əvvəl bəzi saytlar icra başçısının rayonda keçirilən bütün tender işlərini yaxın qohumu və həmkəndlisi olan Məlik adlı şəxsə həvalə etdiyini yazıb: "Rayonda əksər MMC-lər ya onun öz adına yaradılıb, ya da başqa bir yaxınının adına sənədləşdirilib. Lakin bütün buna baxmayaraq, prosesə birbaşa Məlik özü nəzarət edir". Başqa bir məlumata görə isə, rayonun təhsil, səhiyyə, yol və əhalinin sosial müdafiəsi sahəsində ciddi nöqsanlar mövcuddur: "Ağstafada ünvanlı yardımlar dövlətin təsdiq etdiyi formada verilmir. Aidiyyəti vəzifə sahibləri aztəminatlı ailələrin başına oyun açır və onları aylarla süründürməçiliyə məruz qoyur. Əsas problemlərdən biri də yolla bağlıdır. Rayon mərkəzi istisna olmaqla, kənd yolları yaman gündədir. Yağış, qar yağan kimi kəndlərdə nəqliyyatın hərəkəti iflic olur. Palçıq əlindən tərpənmək mümkün olmur. Ötən illərin dövlət büdcəsindən Ağstafada yol infrastrukturunun yaxşılaşdırılması məqsədilə irihəcmli vəsaitlər ayrılıb. Lakin bəzi şəxslərin qabarıq iştahası məbləğin tamamının nəzərdə tutulan layihələrə xərclənməsinə zəmin yaratmadı. Təhsil və səhiyyə sistemi də acınacaqlı haldadır. Rayon Mərkəzi Xəstəxanası nəyə çevrilib, bunu hər kəs bilir. Həkimlər xəstəxanaya müraciət edən vətəndaşların səhhəti ilə maraqlanmaq yerinə, onların cibində pulun olub-olmadığını soruşurlar. Hamının beynində problemlər dolaşır". Onu da qeyd etmək lazımdır ki, Məhərrəm Quliyev başçı vəzifəsinə keçəndən sonra Ağstafada meşələr talan edilir: "Qarayazı meşələri tamamilə məhv olmaq təhlükəsi ilə üzləşib. Ekologiya və Təbii Sərvətlər Nazirliyinin yetkili şəxsləri, həmçinin aidiyyəti hüquq-mühafizə orqanlarının əməkdaşları yaşıllıqların qəsdinə duran şəxslərə qarşı ciddi mübarizə tədbirləri aparsalar da, odun biznesmenləri qanunsuz əməllərindən geri çəkilmirlər. Ağstafada son illər meşələr vandalcasına məhv edilir. Rayon camaatı bununla bağlı müvafiq instansiyalara çoxsaylı müraciətlər edib, amma ağacları məhv edənlərə qarşı mübarizə yox dərəcəsindədir. Məhərrəm Quliyev icra başçısı vəzifəsinə keçəndən sonra isə bu sahədə vəziyyət daha da ağırlaşıb. Bu gedişlə Qarayazı meşələrində ağac qalmayacaq. Özü də meşələrin kütləvi şəkildə qırılmasının səbəbkarları sıravi adamlar deyillər. Qarayazı meşələrinin kütləvi şəkildə qırılmasının səbəbi bu ağaclardan mebel sənayesində total şəkildə istifadə olunmasıdır. Həmin mebel sənayesi isə rayonda fəaliyyət göstərən sexlərdən ibarətdir. Bu sexlər Ağstafanın icra başçısı Məhərrəm Quliyevlə müavini Ramiz Tatarova məxsusdur. Həmin mebel sexlərində istehsal olunan məhsulların bir qismi Bakıya satışa göndərilsə də, bir qismi rayonda keçirilən tenderlərdə işə yarayır. Belə ki, həmin tenderlərdə yumşaq və bərk mebellər olan maddə üzrə bütün alqı-satqı işləri həmin sexlərin məhsulları hesabına reallaşdırılır. Bundan başqa, meşələri məhv edən şəxslər odunları rayon camaatına satırlar. Çünki Ağstafanın əksər kəndlərində vətəndaşların mavi yanacaqla təminatı olduqca bərbad vəziyyətdədir. Əhali qışda soyuqdan donmamaqdan ötrü əsasən odundan istifadə edir. Odun isə meşə massivlərinin qırılması hesabına əldə olunur. Rayonda bir maşın odunun qiyməti 600-800 manat arasında satılır. İcra başçısı Məhərrəm Quliyev və müavini Ramiz Tatarovun icazəsi olmadan heç kim ağacları məhv edə bilməz. Çox maraqlıdır ki, icra hakimi törətdiyi "yaşıl soyqırım"ı diqqətdən kənarda sazlamaq üçün rayonun bəzi mərkəzi hissələrində il ərzində bir neçə dəfə ağacəkmə kampaniyası həyata keçirir. Amma bu sırf görüntü yaratmaq naminə atılan addımdır. Əkilən ağaclara qulluq göstərilmir və onlar bir müddətdən sonra quruyub məhv olurlar. Məhərrəm Quliyev ağstafalılara yuxarıdan aşağı baxır, özünü təkəbbürlü aparır. Bu isə sakinlərin kəskin etirazına səbəb olur". Mötəbər mənbənin bildirdiyinə əsasən icra başçısının vəzifədən azad olunacağı gün elə də uzaqda deyil: "Rayonda başçının tezliklə işdən çıxarılacağı haqda söhbətlər yayılmağa başlayıb. Başçı özü də yaxşı bilir ki, ona tapşırılan vəzifənin öhdəsindən layiqincə gələ bilmir. Bütün bunları, yəni rayonda hökm sürən ümumi ab-havanı nəzərə alsaq əminliklə deyə bilərik ki, Məhərrəm Quliyev ən qısa müddətdə görəvdən alına bilər".
