“Bu gün dünyanın ayrı-ayrı bölgələrində, məsələn, Hindistan-Pakistan, İran-İsrail, Ukrayna-Rusiya münaqişələrinin başlıca səbəbi qlobal iqtisadi böhranın dərinləşməsi və bunun siyasi böhranla nəticələnməsidir. Mümkündür ki, daha bir neçə ölkə arasında münaqişə yaransın”.

Bunu “Reytinq” qəzetinə açıqlamasında Azərbaycan Demokrat Partiyasının (ADP) sədri Sərdar Cəlaloğlu deyib.

S. Cəlaloğlu İranın hədəf seçilməsinin səbəblərindən də söz açıb:

“İndiki halda İranın İsrail tərəfindən hədəf seçilməsinin səbəbi İranın İsraili özünə düşmən seçməsi, atom silahı əldə etmək planı, proksi qüvvələri vasitəsilə İsrailə qarşı mübarizə aparması, İsrail sərhədlərini özünün təsir sahəsi görməsidir. Yəni İranın vurulmasının birinci səbəbi budur.

Sözsüz ki, bəhanə atom silahının hazırlanmasıdır. Amma atom silahı hazırlayan ölkəni vurmaq legitim hədəfdirsə, o zaman İsraili hamı vurmalıdır, çünki çoxlu atom başlıqları var. Demək istəyirəm ki, burada nüvə, atom silahı kimi məsələlərdən sadəcə bəhanə kimi istifadə edirlər.

İkinci vacib səbəb İranın Rusiya ilə sıx əməkdaşlığı, Ukraynaya qarşı Moskvaya raketlər və “Şahed” dronlarının verilməsidir. Bu hal Ukraynanı dəstəkləyən ölkələrə ciddi təsir edir. Güman edirəm ki, İran bir tərəfdən özünün əməllərinə, digər tərəfdən isə Rusiyaya yaxından dəstək verdiyinə görə cəzalandırılır”.

ADP sədri xatırladıb ki, ABŞ Rusiyaya dəstək verən qüvvələri cəzalandıracağını əvvəlcədən elan edib:

“İran Rusiya ilə hərbi müttəfiqlik müqaviləsi bağlayıb, Rusiyaya dron, raket və s. verir. Odur ki, indi İranın vurulmasının konkret iki səbəbi var - Yaxın Şərqdə özünə təsir dairəsi yaratmaq cəhdi və Rusiyanı Ukraynaya qarşı dəstəkləməsi.

Nəzərə almaq lazımdır ki, keçmiş tarixdə Ukrayna özü yəhudi dininin geniş yayıldığı ərazilərdən olub. Yəni bir çox səbəblərdən yəhudilər Ukraynanın intiqamını alır, eyni zamanda öz təhlükəsizlik məsələlərini təmin edirlər”.

S. Cəlaloğlu məsələlərə açıq baxmağın tərəfdarıdır:

“İranın İsrailə cavab vermək imkanı yoxdur. Məsələn, məlumata görə, dünən İran İsrail istiqamətində yüzlərlə dron göndərib və onların hamısı məhv edilib. İsrail İrandan uzaq məsafədədir. İsrailin müasir texnika ilə təchiz olunan ordusu var, istənilən məsafədən İranı vura bilir. İran isə uzun illər sanksiya altında olduğundan müasir - V nəsl müharibəsi aparmaq üçün silahları yoxdur. Yalnız müəyyən dron resursu var, bu da uzaq məsafə qət etdiyi üçün İsrail tərəfindən neytrallaşdırılır. Eyni zamanda indi məlum olub ki, İsrail İranı təkcə kənardan deyil, həm də İran daxilində müəyyən hazırlıq görərək vurub”.

Siyasətçi sonda bildirib ki, bu münaqişə davam edəcəyi təqdirdə ciddi problemlər yaranacaq. Ancaq o, inanmır ki, bu, uzunmüddətli müharibəyə çevrilsin: “İran çalışacaq ki, İsrailin hansısa mövqelərini vursun, amma bu, bizim düşündüyümüz kimi, uzunmüddətli müharibə olmayacaq. Nə İran, nə də İsrail bunu istəyir. İsrailin əsas hədəfi Yxın Şərqdir - Suriya, Livan və s. Odur ki, İranla genişçaplı və tükəndirici müharibə aparmaq imkanına malik deyil. İran da açıq savaşa girib qüvvələrini məhv etmək istəməz. Odur ki, simasını qorumaq üçün kosmetik əməliyyat aparacaq, amma ciddi iş görə bilməyəcək və sonda tərəflər sakitləşəcək”.