Bu ilin martındakı əfv sərəncamı ilə azad olunan sabiq səhiyyə naziri Əli İnsanovun uzun zamandır anonsları verilən partiyasının adı məlum olub. Yeni müxalif qurum Haqq Ədalət Partiyası (HƏP) adlanır. Bu barədə sabiq nazirin öz adına fəaliyyət göstərən facebook səhifəsində məlumat verilib.
Partiya sıralarında sabiq səfir İsfəndiyar Vahabzadə, Bakı Dövlət Universitetinin sabiq əməkdaşı, Bakı şəhəri 23 saylı orta məktəbin sabiq direktoru Qalibə Budaqova, baş prokurorun sabiq köməkçisi Mirədalət Talışxanov və digər şəxslər var.
“Əli İnsanovun partiya yaratması o qədər kiçik hadisədir ki, onu şərh etməyə belə dəyməz. Hadisələr göstərir ki, bu insan cəmiyyət üçün bütünlüklə itirilmişdir. Məhbusluq həyatı ona dərs olmadı, islah olunmadı”.
Baş nazirin müavini, YAP-ın sədr müavini, icra katibi Əli Əhmədov APA-nın sualını cavablandırarkən belə deyib.
Əli Əhmədov qeyd edib ki, elan etdiyi partiyaya gəldikdə isə hələlik məlum olan odur ki, özünə məşğuliyyət tapa bilməyən bir neçəsi onun yanına gedib gəlir: “Cəmiyyət Əli İnsanovun bir neçə bəyanatını soyuq və biganə qarşıladığı kimi, yaratdığını elan etdiyi partiyaya da münasibət fərqli olmayacaq. O, sosial bazadan tam məhrumdur. Onun partiya yaratması ilə əlaqədar diqqəti çəkən yalnız ad oldu. Daha doğrusu, adın və mahiyyətin dərin təzadı. Əli İnsanov hara, haqq-ədalət hara. Bu gün cəmiyyətdə Əli İnsanovla əlaqədar aparılan müzakirələr əsas etibarilə onun qanunsuz yollarla əldə etdiyi sərvətlər və malikanələri haqqındadır. Onun Haqq Ədalət Partiyası yaratması, əslində bəşəri dəyərlərə hörmətsizlikdir, həqarətdir. Əli İnsanovu tanıyanlar çox gözəl bilir ki, bu insanın xarakterində həmin anlayışlara heç zaman yer olmayıb və bu gün də yoxdur. Onda nə ədalət var, nə də o, haqqı tanıyan insandır ”.
AĞ Partiya başqanı Tural Abbaslının yeni partiya barədə fikirləri bundan ibarətdir: “Siyasi səhnədə nə qədər çox partiya, təşkilat, blok, birlik, hərəkat olarsa, insanların da siyasi aktivliyi bir o qədər artar. Yəni siyasi palitranın zənginləşməsi müsbət haldır. Dediklərimi nəzərə aldıqda təbii ki, biz yeni yaradılması nəzərdə tutulan partiyaya uğurlar arzulayırq. Onlar hələlik ancaq qurultaya hazırlıq üzrə təşkilat komitəsini elan ediblər. Bunu hələlik tam vitrin hesab etmək olmaz. Vitrin barədə konkret nəsə demək üçün hələ bir az zamana ehtiyac var. Həmçinin başqa bir partiyanın vitrininin özümüz tərəfindən təftişini də etik hesab etmirəm. Bu əlahiddə olaraq onların biləcəyi daxili məsələdir. Xalqın bu vitrinə reaksiyasının və etimadının necəliyini isə zaman göstərəcək. Müxalifət camiəsinin yeni yaranacaq partiya ilə qarşılıqlı əlaqələri barədə də indidən nəsə demək tez olardı, bunun da zaman ehtiyacı var. Bu münasibətlər daha çox yeni yaranacaq partiyanın siyasi ideologiyasından və mübarizə strategiyasından asılı olacaq. O ki, qaldı Əli İnsanovun yeni müxalif partiya sədri obrazına, bunun da necə olacağını zaman göstərəcək. İstənilən halda yeni təşkilata və onun təşəbbüskarlarına uğur arzulayırıq”.
ADP sədri Sərdar Cəlaloğlu HƏP barədə danışmağın tez olduğunu qeyd etdi: “Əvvəla, onu deyim ki, yeni yaranmış partiya hələ özünü cəmiyyətə təqdim etməyib. Siyasi təşkilatlanma və siyasi mübarizə üç mərhələdən keçir. Özünü yaratma, özünü təqdimetmə və ondan sonra hədəflər uğrunda mübarizə. Biz indi gözləyək görək bu özünü cəmiyyətə necə tanıda biləcək, nə qədər xalq bunu qəbul edəcək? Elə düşünməyək ki, kimsə nəsə yaratdısa, ortaya nəsə qoydusa, cəmiyyət dərhal bu ideyanı göydən tutacaq. Təşəbbüs qrupunun tərkibinə baxdım. Orada demək olar ki, təmsil olunanlar keçmiş YAP-çılardır. Yeni YAP-çılarla keçmişdəkilərin bir fərqi var ki, yenilər, yəni sabiq YAP-çılar inciklərdir. YAP-da qalanlar isə belə deyillər. İnciklərin aparacağı mübarizə AXCP-Müsavatın apardığı revanşist mübarizədən heç də fərqlənməyəcək. Bunlar ola bilsin ki, nəsə bir mübarizə aparsınlar. Amma bu, YAP-ın ümumi ruhuna uyğun mübarizə olacaq. Sadəcə olaraq, revanşizm bir qədər üstünlük təşkil edəcək. Partiyanın təşəbbüskarlarının demək olar hamısı keçmiş YAP-çılardırsa, bu onu göstərir ki, YAP-dan, bütövlükdə hakim komandadan uzaqlaşdırılanlar İnsanovun yanına axışacaqlar. Bunların ən böyük xidmətləri o bilər ki, vaxtilə YAP-ın sıralarında olarkən xalqa vurduqları ziyanı kompensasiya etsinlər. Bundan uzağa böyük nəticələr əldə edə bilməyəcəklər. Açığı, düşünmürəm ki, özlərinin vurduqları ziyanları belə aradan qaldıra bilsinlər. Müxalifətə də güc, potensial gətirəcəyinə inanmıram. Amma hər halda, istənilən şəxsin partiya yaratmaq hüququ var. Bu adamlar da yığışıb bir təşkilat yaradıblar. Gözləyək görək nə olacaq? Əli İnsanov həbsxanadan çıxanda bir bəyanat vermişdi. Ona müxalifətlə birləşib-birləşməyəcəyi barədə sual verildi. O dedi ki, bilmək olmaz, müxalifət mənim ətrafımda birləşəcək, yoxsa mən onların ətrafında. Ola bilsin ki, isti-isti o fikirlərini korrektə edə bilmirdi. Amma səmimi şəkildə bu şəxs birlik məsələsində hansı mövqe durduğunu ortaya qoydu. O yerdə ki ambisiya var, o yerə ki eqoist maraqlarla qoşulursan, orada heç vaxt ümumi maraqlara xidmət edəcək nəsə ortaya çıxa bilməz. Bu baxımdan onun iddialığını nəzərə alıb demək istəyirəm ki, Əli İnsanov birləşdirici fiqur ola bilməz. Müxalifətin birliyi yolunda da əhəmiyyətli rol oynaya bilməyəcək”.
AMİP katibi Əli Orucov: “Əli İnsanov azadlığa çıxandan dərhal sonra partiya yaradacağını elan etmişdi. İndi Haqq Ədalət Partiyasının Təşkilat Komitəsinin tərkibini cəmiyyətə çatdırdı və bu birmənalı qarşılanmadı. Hər bir şəxsin hansısa siyasi təşkilatlarda birləşməsi onun konstitusion hüququdur. Tərkibdə mənim tanıdığım simalar yoxdur. Lakin yeni elan olunan partiyanın fəaliyyətinə və bütövlükdə partiyanın özünə Azərbaycan toplumu öz qiymətini verəcək. Bu partiyanın müxalifət düşərgəsində hansısa dönüşü yaradıb-yarada bilməyəcəyini isə zaman göstərəcək. Müxalifət düşərgəsində kəmiyyət deyil, keyfiyyət dəyişikliyinə ehtiyac var. Əli İnsanovun partiya yaratmasından biz niyə narahat olmalıyıq? Biz qətiyyən narahat deyilik. Əli İnsanov kimlərlə oturub-durur, müzakirələr aparır, onlar narahat olsunlar ki, elektoratlarını və tərəfdarlarını ələ keçirə bilər. AMİP demokratik, sağlam təməllər üzərində qurulan, ölkənin aparıcı və bir saylı siyasi partiyasıdır. Partiyanın gündəmində isə hər hansı birlik yaratma ilə bağlı məsələ yoxdur”.
“Yeni Müsavat”
