Bu ilin avqust ayında Azərbaycanda barəsində ən çox şikayət edilən bank “Expressbank” ASC olub. Bu barədə Azərbaycan Mərkəzi Bankı məlumat yayıb.
Şikayət olunan bankların siyahısında “Yelo Bank” ASC ikinci, “Unibank” ASC isə üçüncü olub.

Lakin ən diqqətçəkən məqam “Yelo Bank”ın bu siyahıda birdən-birə üç pillə yüksəlməsidir. Belə ki, Belə ki, 2024-cü ildə ən çox şikayət olunan bankların siyahısında “Yelo Bank” 5-ci yerdə olub. Bu il isə 2-ci pilləyədək “irəliləyib”.

Bizim.Media “Yelo Bank”la bağlı şikayətlərin çox olmasının səbəblərini araşdırıb.

Nəzərə alaq ki, əvvəlki adı "Nikoil bank" olan, rebrendinq edərək "Yelo Bank" adlanan bankla bağlı məhkəmə işlərinin sayı kifayət qədərdir. Müştərilər müxtəlif iddialarla mülki iş qaldırıblar. Adekvat olaraq bankın da məhkəməyə verdiyi vətəndaşlar az deyil. Bunu internet resurslarında hər gün yayılan xəbərlərdən görmək mümkündür.

Bir müddət əvvəl “Yelo Bank” Gəncədə bir qrup vətəndaşı məhkəməyə versə də, şikayətin təmin edilməsi qeyri-mümkün hesab edilib. Bank Gəncə şəhər sakini olan altı nəfərlə bağlı məhkəmədə iddia qaldırıb.

Lakin məhkəmə bankın iddiasını rədd edib.

"Yelo Bank”dan narazılığını bildirmiş daha bir vətəndaş isə Rəşad Balayevdir. Onun dediyinə görə, Koreyadan hesabına 750 dollar pul göndəriblər:

”Yelo Bank” pulu qəbul etmir, geri də qaytarmır ki, xidmət haqqı tutulacaq. Bu nə dərəcədə doğrudur? Pulu qəbul etməməyin səbəbi odur ki, bu pulun niyə göndərildiyi ilə bağlı əsas göstərməyimizi tələb edirlər. Geri də qaytaranda xidmət haqqı tutulacağını deyirlər. Göstərilməyən xidmətə görə haqq tutmaq nə dərəcədə düzgündür?”

Qazinin evini əlindən almaq istədi

Qarabağ qazisi, jurnalist Mustafa Hacıbəyli bu bankda üzləşdiyi problemlə bağlı uzun müddət mətbuatda müzakirələr getdi. “Yelo Bank” qazinin yeganə evini əlindən almaq istəyirdi.

Bu bankdan başqa bir şikayətçi isə Qadir Asifsoy olub. O bildirib ki, ödəniş etsə də borcun üstünə əlavə faiz gəlir:

“Bir neçə ay öncə “Yelo Bank”dan kredit götürdük. Ödənişi həmişə 2-3 qat artıq ödəmişəm. Bu ay isə baxdım ki, aylıq ödəniş düşüb 39,88 AZN-ə. Kapital kartımdan onlayn qaydada 40 manat ödəniş etdim. Ödənişi 2 fevral tarixində etmişəm. Bu barədə bu günə kimi 7 dəfə məlumat vermişəm. Araşdıracağıq deyirlər, lakin ortada bir şey yoxdur. Mobil tətbiqdən baxıram gündəlik üzərinə faiz məbləği gəlir. Bu gün banka yaxınlaşdım, cavab verə bilmədilər. Deyir bizlik deyil!”

20 milyonluq mənimsəmə

Qeyd edək ki, daha əvvəl "Nikoil bank” kimi fəaliyyət göstərən "Yelo Bank”ın adı bu günə qədər bir çox qalmaqallarda hallanıb və bank ziyanla işləyir. Bankın ziyanla işləməsinin rəhbərliyin bankın pullarını mənimsəməsi ilə əlaqəli olduğu bildirilir.

Yerli mətbuatın yazdığına görə, Vahid Ələkbərova məxsus bankın talan olunması hələ 2005-ci ildən başlayıb. Əvvəlki "Nikoil” İKB-a sədrlik edən Vasiliy Xamaza adıçəkilən bankın 20 milyon manatını mənimsəməkdə ittiham olunmuşdu. 2017-ci ilin yarısına kimi banka sədrlik etmiş V.Xamaza Azərbaycanı tərk edib. Federal və beynəlxalq cinayət axtarışına verilən Xamaza 2018-ci ilin sentyabr ayında Moskva şəhərində hüquq-mühafizə orqanları tərəfindən saxlanılıb.

Bankın aktivlərində azalma

Nəzərə alaq ki, 2025-ci il “Yelo Bank” üçün uğurlu olmayıb. Aprelin 1-nə qurumun aktivləri ilin əvvəli ilə müqayisədə azalıb. Belə ki, bankın aktivləri 1 milyard 279 milyon 637 min manatdan 1 milyard 260 min 888 min manata düşüb.

“Yelo Bank”ın nağd pul vəsaitləri və ekvivalentləri, o cümlədən bloklaşdırılmış nağd vəsaitləri də azalıb. 2024-ci ilin sonundakı 229 milyon 962 min manatdan aprelin 1-i tarixinə 213 milyon 309 min manata düşüb.

Maliyyə qurumunun banklar və digər maliyyə institutlarındakı depozitlərinin həcminə gəlincə, ilin əvvəlindəki 61,743.80 min manatdan birinci rübün sonuna 21,124.40 min manata düşüb. Bankın öhdəlikləri 2024-cü ilin sonundakı 1 milyard 135 milyon 645 min manatdan 2025-ci ilin ilk üç ayında 1 milyard 105 milyon 813 min manata qədər azalıb.

Öhdəliklərin azalmasında əhalinin bankdan pullarını geri götürməsi rol oynayıb. Belə ki, maliyyə qurumunun depozit portfeli 2024-cü ilin son rübü ilə müqayisədə (928,774.35) 15 milyon 296 min manat azalaraq 913,477.90 min manata düşüb. Hesabat dövründə hüquqi şəxslər 24 milyon 337 min manatı bankdan çıxarıblar. Ümumilikdə bankın kredit portfeli 960,276.43 min manat, depozit portfeli isə 913,477.90 min manatdır.

Qeyd edək ki, "Yelo Bank”ın Rusiyada yaşayan Azərbaycan əsilli milyarder, "Lukoil” şirkətinin sahibi Vahid Ələkbərova məxsus olduğu bildirilir.