Bakı Ağır Cinayətlər Məhkəməsində vətəndaşa qarşı külli miqdarda dələduzluq etməkdə təqsirləndirilən "Homeline" tikinti şirkətinin direktoru Alik Quliyevin cinayət işinin bəzi detalları məlum olub.

Pravda.az-ın əldə etdiyi məlumata görə, hakim Nigar İmanovanın sədrliyi ilə keçirilən prosesdə ittiham aktı elan olunub.

İttiham aktına əsasən, təqsirləndirilən şəxs müxtəlif şəxsləri torpaq sahələrinin sənədləşdirilməsi, tikinti layihələrinə şərik edilmə, mebel sifarişlərinin hazırlanması və mənzillərin təmiri ilə bağlı yalan vədlərlə aldadaraq onlardan külli miqdarda pul vəsaiti almaqda ittiham olunub.

Belə ki, Alik Quliyev tamah niyyəti ilə hərəkət edərək müxtəlif vaxtlarda etibardan sui-istifadə və aldatma yolu ilə özgələrin əmlakını ələ keçirmək məqsədilə fəaliyyət göstərib.

Cinayət işi materiallarında göstərilir ki, epizodlardan biri zərərçəkmiş S.S.-ə (adı, soyadı şərtidir) məxsus torpaq sahəsinin sənədləşdirilməsi ilə bağlı olub. Təqsirləndirilən şəxs özünü torpaq sahələri və daşınmaz əmlaklara çıxarış almaq imkanına malik etibarlı şəxs kimi təqdim edib. O, zərərçəkmiş şəxsə məxsus qeyri-yaşayış obyektinin yerləşdiyi 60 sot torpaq sahəsinin 36 sot hissəsinə çıxarış alacağını vəd edib.

Alik bu vədlərlə S.S.-in etibarını qazanaraq əvvəlcə 2022-ci ilin oktyabr ayında zərərçəkmişin kürəkəni vasitəsilə Bakı şəhərinin Nərimanov rayonu ərazisində 80 000 manat pul alıb. Bundan bir müddət sonra isə eyni məqsədlə S.S.-dən əlavə olaraq 60 000 manat pul vəsaiti əldə edib.

Beləliklə, istintaqın qənaətinə görə, həmin epizod üzrə zərərçəkmiş şəxsə ümumilikdə 140 000 manat məbləğində maddi ziyan vurulub.

Araşdırmalar zamanı müəyyən edilib ki, Alik əldə etdiyi vəsaitləri vəd etdiyi məqsədlər üçün istifadə etməyərək şəxsi ehtiyaclarına sərf edib.

Cinayət işi materiallarında göstərilir ki, növbəti epizod zərərçəkmiş D.D.-in (adı, soyadı şərtidir) biznes layihəsinə investisiya yatırması adı altında aldadılması ilə bağlı olub. Təqsirləndirilən şəxs özünü iş adamı kimi təqdim edərək zərərçəkmiş şəxsdə maddi imkanları geniş olan sahibkar görüntüsü yaradıb.

O, D.D.-yə Tovuz rayonu ərazisində yerləşən “Ayan Palace” otelinin həyətində üç villa tikintisi layihəsini əldə edə biləcəyini və həmin layihəyə onu da şərik edəcəyini bildirib. Alik layihədən yüksək gəlir əldə olunacağını vəd edərək zərərçəkmiş şəxsin etibarını qazanıb. 2023-cü ildə Bakı şəhərində yerləşən restoranların birinin həyətində keçirilən görüş zamanı S.S.-dən 65 000 manat pul vəsaiti alıb. Həmin pul vəsaiti də vəd olunan layihəyə yönəldilməyib və şəxsi məqsədlər üçün istifadə olunub.

Bu epizod üzrə zərərçəkmiş şəxsə 65 000 manat məbləğində maddi ziyan vurulduğu müəyyən edilib.

Cinayət işi materiallarında göstərilir ki, digər epizod mebel sifarişləri ilə bağlı olub. Alik özünü tikinti və təmir sahəsində peşəkar mütəxəssis kimi təqdim edib. O, zərərçəkmiş F.F.-ə (adı, soyadı şərtidir) Bakı şəhərində yerləşən mənzil üçün sifariş edilən mebellərin yüksək keyfiyyətlə hazırlanacağını və qısa müddətdə təhvil veriləcəyini vəd edib.

Bu məqsədlə 2024-cü ildə zərərçəkmiş şəxsdən vasitəçi şəxs vasitəsilə 58 000 manat məbləğində pul alınıb. Lakin sonradan mebellərin hazırlanmadığı və vəsaitin təyinatı üzrə istifadə edilmədiyi müəyyən olunub.

Kamal Məmmədov

İstintaq orqanı həmin epizod üzrə zərərçəkmiş şəxsə 58 000 manat məbləğində ziyan vurulduğunu hesab edib.

Araşdırmalar zamanı müəyyən edilib ki, təqsirləndirilən şəxsin ən iri epizodlarından biri mənzil təmiri adı altında vəsait əldə etməsi ilə bağlı olub. O, özünü tikinti və təmir sahəsində fəaliyyət göstərən şirkətin direktoru kimi təqdim edib və zərərçəkmiş C.C.-nin (adı, soyadı şərtidir) etibarını qazanıb.

Cinayət işi materiallarında göstərilir ki, təqsirləndirilən şəxs Bakı şəhərinin Keşlə qəsəbəsində yerləşən 312 kvadratmetr sahəsi olan mənzilin yüksək keyfiyyətli materiallarla təmir ediləcəyini və beş ay ərzində təhvil veriləcəyini vəd edib. Bu məqsədlə zərərçəkmiş şəxs müxtəlif vaxtlarda həm nəğd şəkildə, həm də bank köçürmələri vasitəsilə təqsirləndirilən şəxsə çoxsaylı ödənişlər edib.

Ödənişlərin bir hissəsi şirkətin ofisində nəğd qaydada təqdim olunub, digər hissəsi isə müxtəlif bank kartlarına köçürülüb.

2024-cü il ərzində həyata keçirilən çoxsaylı köçürmələr və nağd ödənişlər nəticəsində Alik zərərçəkmiş şəxsdən ümumilikdə 90 000 manat məbləğində pul vəsaiti əldə edib. Lakin sonradan təmir işlərinin vəd edildiyi şəkildə həyata keçirilmədiyi, alınmış vəsaitlərin isə şəxsi məqsədlər üçün istifadə olunduğu müəyyən edilib.

Beləliklə, istintaq orqanının qənaətinə görə, təqsirləndirilən şəxs müxtəlif şəxsləri aldadaraq torpaq sənədləşdirilməsi, tikinti layihələri, mebel sifarişləri və təmir işləri adı altında ümumilikdə 227 000 manat pul vəsaitini ələ keçirib.

Toplanmış sübutlar, zərərçəkmiş şəxslərin ifadələri, bank əməliyyatları, şahid ifadələri və digər materiallar əsasında ona təkrar və külli miqdarda ziyan vurmaqla törədilmiş dələduzluq əməlləri ilə bağlı ittiham irəli sürülüb.

Məhkəmənin hökmü ilə Alik Quliyev 6 il 2 ay 10 gün müddətə azadlıqdan məhrum edilib.