Gürcüstanda oktyabrın 26-da keçirilən parlament seçkilərinin nəticələrinə əsasən, hakimiyyəti əlində saxlayan “Gürcü Arzusu – Demokratik Gürcüstan” Partiyasının Rusiyaya meyilli siyasətindən narazılıq davam etməkdədir. Gürcü müxalifəti və Qərbyönümlü ictimai təşkilatlar hesab edirlər ki, “Gürcü Arzusu”nun bütün sahələrdə atdığı addımlar, aparılan siyasət ruspərəstdir.
Bu günlərdə Gürcüstanda 2025-ci il üçün Vahid Milli İmtahanlar proqramına edilən dəyişikliklərlə bağlı yeni qalmaqal yaranıb. Belə ki, 19-cu əsrin birinci yarısında çarizmə qarşı üsyanlar, Gürcüstanın Rusiya imperiyası tərəfindən ilhaqına və dövlətçiliyinin ləğvi barədə əsas hadisələrlə bağlı suallar tarix imtahanı testlərindən çıxarılıb. Gürcü ictimaiyyəti hesab edir ki, həmin hadisələrlə bağlı dərsliklərdəki məlumatlar milli kimliyin formalaşmasında mühüm rol oynayəb və müstəqillik uğrunda mübarizə aparan nəsilləri ruhlandırıb. Buna görə də, dəyişikliklər akademik ictimaiyyətin qəzəbinə səbəb olub.
Gürcü tarixçi Temo Papaskiri bu dəyişikliyi siyasi motivli sayır. Tarixçi “TV Pirveli”yə deyibn ki, bu gün “Gürcü Arzusu” gürcü ruhuna zidd addımlar atır: “Rejim o qədər anti-gürcü və o qədər rusiyapərəstdir ki, bu, onların bütün bu müddət ərzində həyata keçirdikləri rusiyayönlü siyasətin praktiki olaraq davamıdır”.
Gürcü dili və ədəbiyyatı da proqramdan kəskin şəkildə çıxarılıb. Əsərlər arasında Aleksandr Kazbeqinin “Heavisberi Qoça” hekayəsi, İlya Çavçavadzenin “Xoşbəxt millət” və Aleksandr Çavçavadzenin “Qoqça” şeirləri, Vaja Pşavelanın “Baxtrioni” poeması, dissident Paolonun poeziyası da proqramdan çıxarılıb. Bununla yanaşı, İaşvili, Nikoloz Barataşvili, Sulxan Sabanın bəzi məsəlləri, Orbeliani, Akaki Tsereteli və Polikarpe Kakabadzenin əsərləri ixtisar edilib.
Gürcüstanın müxalif Prezidenti Salome Zurabişvili əmindir ki, dəyişikliklər milli vətənpərvərlik ideyalarını sıxışdırmağa yönəlmiş dövlət siyasətinin tərkib hissəsidir.
“2025-ci il proqramının siyahısından “Xoşbəxt millət”, “Zahid”, “Cavabın cavabı”, “Kabus” və İlyanın “Otarovun dul arvadı” çıxarılıb. Paolo İaşvili və Polikarpe Kakabadzenin əsərləri, Vajanın "Vətənpərvərlik və Kosmopolitizm" əsəri tamamilə proqramdan silinib... Təhsil sistemini və müvafiq olaraq dövləti hansı milli və vətənpərvərlik ideyalarının idarə etdiyi aydındır" – Zurabişvili “Facebook” səhifəsində yazıb.
Gürcüstanın Təhsil Nazirliyi isə iradlarla razı deyil. Nazirliyin açıqlamasında bildirilib ki, proqramda dəyişikliklər abituriyentlərin maraqlarına uyğundur. Nazirlik iddia edir ki, “indi imtahan testləri yalnız icbari məktəb kurikulumunu əhatə edir.
“Tədris proqramı dəyişməyib, heç bir parça proqramdan çıxarılmayıb. Yeni proqram yalnız milli kurikulumda nəzərdə tutulan icbari ədəbiyyatlar əsasında hazırlanıb”, - deyə Təhsil Nazirliyinin açıqlamasında qeyd olunub.
Nazirlikdən bildirilib ki, ekspertlər cəlb edilməklə tələb olunan ədəbiyyatların siyahısına yenidən baxılır.
“İmtahan planında çatışmayan işlərlə bağlı, həmçinin abituriyentlər arasında milli vətənpərvərlik dəyərlərinin daha da formalaşmasına töhfə verəcək bütün məsələlərlə bağlı təkliflər ediləcək”, deyə qeyd olunub.
