FAZİL MƏMMƏDOV ŞOU-BİZNESƏ ƏL GƏZDİRƏCƏK
3-07-2012, 16:49
QAZ VURUB QAZAN DOLDURAN MÜĞƏNNİLƏR HƏDƏFƏ ÇEVRİLİR
DİA.AZ: - Müğənnilərimiz el şənliklərindən və şou-proqramlardan qaz vurub qazan doldurduqları halda vergi ödəməkdən nədənsə boyun qaçırırlar. Onu da xatırladaq ki, neçə müddətdir ki, bu problem - yəni müğənnilərin vergidən yayınması aktual bir məsələyə çevrilsə də, hələ də orda-burda böyük-böyük danışıb, vətənpərvərlikdən dəm vuran ayrı-ayrı şou-biznes nümayəndələri vergi verməyə nəinki maraq göstərmirlər, ümumiyyətlə, bu öhdəliyə əməl etməyi ağıllarının ucundan da keçirmirlər.
Bu səbəbdən də Vergilər Nazirliyinin hətta müğənnilərin qara siyahısını hazırlaması da məlumdur. Bildirək ki, hər dəfə bu məsələ qaldırılanda vergidən yayınan müğənnilərin siyahısında adı olan müğənnilər isə ciddi-cəhdə vergi ödədiklərini deyirlər. Xatırladaq ki, bir neçə müddət öncə bu məsələ qaldırıldığı zaman müğənnilər hətta Vergilər Nazirliyini hədəfə də almışdılr. Mətbuata açıqlamasında vergi ödədiyini deyən Manana Çaparidze Vergilər Nazirliyinin onun adını hallandırmasını əsassız saymışdı.
“Mən vergidən əlavə hətta bir çox müğənnilərə məlum olmayan Pensiya Fonduna da pul ödəyirəm. Çox təəssüf edirəm ki, vergini vaxtlı-vaxtında ödəməyən müğənnilər sırasında mənim də adım qeyd olunub. Mən Yasamal rayonunda qeydiyyatdayam. İnanmayanlar gedib orada mənim vergi ödəyib-ödəmədiyimi yoxlaya bilər. Hətta əlimdə hər ayın hesabatı var. Bunu da istənilən adama göstərə bilərəm”.
Röya kimi tanınan müğənni Röyalə Nəcəfova da vergisini vaxtlı-vaxtında ödədiyini söyləyir. Əməkdar artist Ədalət Şükürov isə hər ay nə az, nə çox - düz 150 manat vergi ödəyir.
Siyahıda adı olan əməkdar artist Brilliant Dadaşova və müğənni Mətanət İsgəndərli də vergidən yayınmadıqlarını söyləyirlər.
“Cənab qızıl şlyager” Faiq Ağayev isə vergi söhbətindən əməlli-başlı qəzəblənib. Hər rüb gəlirinin 4 faizi mislində vergi ödədiyini deyən əməkdar artist bu məbləğin 100 manatdan çox olmadığını deyir: “Mən vergi ödəyən müğənnilər arasında liderəm və vergi ödəməkdən heç vaxt yayınmamışam. Bundan əlavə, konsertlərimi təşkil edən zaman verginin dəyəri 800 manat olur”.
Hər halda, müğənnilərin özlərinin açıqlamalarında da açıq-aydın duyulur ki, onlar real gəlirlərini dövlətdən gizlədirlər. Elə Faiq Ağayevin açıqladığı rəqəmə baxaq, gəlirinin 4 faizi, yəni 100 manat pul. Belə çıxır ki, Faiq Ağayev bir ay ərzində 2500 manat pul qazanır. Amma Faiq Ağayev qarışıq müğənnilərimizin toy qiymətləri isə bunun tamam əksini deyir.
DİA.AZ-ın apardığı araşdırmalar nəticəsində təxmini olaraq həmin toy tariflərini də müəyyən edə bilmişik ki, həmin qiymətləri diqqətinizə çatdırırıq:
Bütün toy:
Faiq Ağayev - 15 000
Brilliant Dadaşova - 12 000
Abbas Bağırov - 10 000
Xumar Qədimova - 8 000
Samir Piriyev - 7 000
Nadir Qafarzadə - 7 000
Elton - 7 000
Nazpəri Dostəliyeva - 7 000
Vasif Məhərrəmli - 6 000
Könül Kərimova - 6 000
Xatirə İslam - 6 000
Könül Xasıyeva - 6000
Ayaz Qasımov - 5 000
Nüşabə Ələskərli - 5 000
Xuraman Şuşalı - 4 500
Rəqsanə - 4 500
"Şeron" qrupu (Ülvi) - 4 500
Mətanət İskəndərli - 4 500
"Şeron" qrupu (Rüstəm) - 4 500
Faytonçu Nazim - 4 000
İzzət Bağırov - 4 000
Üzeyir Mehdizadə - 4 000
Ruhəngiz Allahverdiyeva - 3 000
Əlikram Bayramov - 3 000
Manaf Ağaev - 3 000
Əflatun Qubadov - 3 000
Mənzurə Musayeva - 3 000
Nazənin - 3 000
Elariz - 3 000
Səməd Səmədov - 2 500
Kamran Həsənli - 2 000
Yarım saat:
Röya - 5 000
Brilliant Dadaşova - 4 000
Aygün Kazımova - 4 000
Namiq Qaraçuxurlu - 3 000
Elnur - 3 000
Xumar Qədimova - 2 500
Manana - 2 500
Ədalət Şükürov - 2 500
Nadir Qafarzadə - 2 000
Eyyub Yaqubov - 2 000
İlqar Muradov - 2 000
Nazpəri Dostəliyeva - 2 000
Xatirə İslam - 2 000
İzzət Bağırov - 1 500
Aygün Bəylər - 1 000
Üzeyir Mehtizadə - 1 000
Ruhəngiz Allahverdiyeva - 1 000
Könül Xasıyeva - 1 000
Meyxanaçı Vüqar - 800
İndi isə özünüz nəticə çıxarın, bütün toyu 15 min manata oxuyan Faiq Ağayev rəsmi hesabatlarında cəmi-cümlətanı bir ay üçün 2500 manat pul qazandığını iddia edir. Buradan da o nəticə çıxır ki, Faiq Ağayev bir ay ərzində yalnız bir dəfə toya çağrılır ki, o da yalnız ağzının açıb-yumması üçün nəzərdə tutulan 2500 manata başa gəlir. Hər halda, В«qızıl şlyagerВ»in söylədiklərindən bu qənaət hasil olur.
Amma deyəsən, bizim kimi rəsmi dövlət qurumları da, xüsusən Vergilər Nazirliyi də müğənnilərin vergi hesabatlarındakı rəqəmlərin saxtalağından şübhələniblər. Bu barədə DİA.AZ-a daxil olan məlumatlardan aydın olur ki, şou-biznes nümayəndələrinin vergi hesabatlarının dəqiq olması üçün nazirlik tərəfindən xüsusi proqram hazırlanır və bu proqram üzərə reydlər keçiriləcək.
Onu da qeyd edək ki, belə bir şərait yalnız Azərbaycanda hökm sürür. Yəni müğənnilərin real qazanclarını dövlətdən gizlətmələri. Məsələn, qardaş Türkiyədə il ərzində 2-3 milyon ABŞ dolları həcmində vergi ödəyən müğənnilər də var. Biz demirik ki, Azərbaycanın şou-biznes təmsilçiləri bu qədər vergi versinlər, amma ən azından bu gün Faiq Ağayev, Manaf, Röya kimi müğənnilərin bir ayda 2-3 min manat vergini sırf qanuni yolla ödəmə qabiliyyətində olmaları hər kəsə məlumdur.
Redaksiyamıza daxil olan bir başqa məlumatda isə bildirilir ki, parlamentin payız sessiyasında müğənnilərlə bağlı vergilər məcəlləsinə dəyişikliklərin edilməsi də planlaşdırılır. Bunun nə qədər həqiqəti ehtiva etməsini isə yaxın gələcəkdə görəcəyik. Bizi izləyin…
Geri qayıt