YENİ NAZİR ƏHMƏD VƏLİYEVƏ QALİB GƏLƏ BİLƏRMİ?
22-05-2013, 17:46
DİA.AZ: - Artıq neçə müddətdir ki, cəmiyyətdə “Odlar Yurdu” Universitetinin bağlanacağı barədə söz-söhbətlər səngimək bilmir. DİA.AZ-a daxil olan məlumatlardan da aydın olur ki, yeni təhsil naziri Mikayıl Cabbarov deputatın rektorluq etdiyi bu tədris ocağına əl gəzdirməyi düşünür. ən azından o səbəbə görə ki, söhbət qanunsuz tələbə qəbulu prosesində “Odlar Yurdu”nin ən aktiv nöqtə rolunu oynamasından gedir. Əslində bu özəl ali təhsil müəssisəsinin təsis olunma prosesi, sahibinin və rəhbərliyinin dəyişilməsi və hazırki rektorunun fəaliyyəti hər zaman bir çox qaranlıq məqamları ilə həm ictimaiyyətin, həm də ölkə mətbuatının diqqətini cəlb edib.
Qeyd edək ki, "Odlar Yurdu" Universitetinin Nizamnaməsi 1993-cü il aprelin 30-da Sabunçu rayon İcra Hakimiyyətində dövlət qeydiyyatına alınıb. Həmin Nizamnamə əsasında Universitet 1995-ci ildə vergi uçotuna durub, “Muğanbank” Kommersiya Bankında hesab açdırıb. 2006-cı ildə Dövlət Statistika Komitəsindən şəhadətnamə alıb. Universitetin qeydiyyata alınması barədə iki dəfə müsbət rəy verilib. Onları 1993-cü ildə Təhsil Nazirliyi və 1995-ci ildə Nazirlər Kabineti yanında Dövlət Ali Ekspert Komissiyası verib.
1996-cı ilin iyulunda Nazirlər Kabineti Universiteti qeydiyyata alıb və lisenziya verib. Vergilər Nazirliyindən isə "Odlar Yurdu" Universitetinin 1993-cü ildə qeydiyyatdan keçdiyini bildirilir. Bir neçə müddət bundan əvvəl isə ölkənin aparıcı informasiya portallarından biri bu universitetin əvvəlki rəhbəri Abdulla Abdullayevdən alınmasının təfərrüatlarına dair çox maraqlı məlumatlar dərc etmişdi. “Odlar Yurdu” Universitetində çalışan və Əhməd Vəliyevə yaxın olan mənbəyə istinad olunaraq dərc edilmiş materialda bildirilirdi ki, bu ali təhsil ocağı Abdulla Abdullayevdən üç-dörd illik çəkişmədən sonra alınıb. Həm də Əhməd Vəliyev bu prosesə görə, xeyli əziyyət çəkməli olub. Materialda göstərilmişdi ki, professor Abdulla Abdullayev həmin universitetin həmtəsisçisi olduğu halda, onu bu hüquqdan ağlasığmaz üsullarla məhrum ediblər. Belə ki, Əhməd Vəliyev öz adamlarının köməyindən istifadə edərək hər cür vasitədən yararlanmaqdan çəkinməyib. Onun universitetə rəhbər olmasını rəsmiləşdirən əsas sənəd isə Abdulla Ablullayevin xeyrinə qərar çıxarmayan məhkəmə proseslərinin hökmləri olub. Qeyd edək ki, Nazirlər Kabineti, habelə vergilər və təhsil nazirlikləri hələ bir neçə il əvvəl Abdulla Abdullayevin ali təhsil ocağına təsisçiliyini təsdiqləmişdilər.
Hələ 2004-cü ildə professor Rövşən Xəlilov təsisçilik hüququnun bərpası ilə bağlı məhkəməyə müraciət etmişdi. İş üzrə cavabdeh qismində həmtəsisçilər professor Abdulla Abdullayev və dosent Əhməd Vəliyev məhkəməyə cəlb olunmuşdular. Bundan sonra isə Əhməd Vəliyev və oğlu Samir Vəliyev Abdulla Abdullayevə qarşı mövqe tutaraq məhkəmə təzyiqlərinə başlayıblar. Rövşən Xəlilov da bu universitetin təsisçisi olduğunu iddia edib. O, bu zaman 1993-cü ildə qeydiyyatdan keçmiş nizamnaməyə əsaslanıb. Həmin sənədə görə isə Abdulla Abdullayev də təsisçidir. Lakin universitetin indiki rektoru Əhməd Vəliyev bunu qəbul etmək istəmir. Əhməd Vəliyev 2005-ci ildə Sabunçu rayon İcra Hakimiyyətinə qarşı 1993-cü il aprelin 30-da onun verdiyi sərəncamın ləğv edilməsi ilə bağlı iddia qaldırır. Hadisələrin sonrakı inkişafı da məhz onun planlaşdırdığı məcrada davam edir. Belə ki, məhkəmə heç bir əsas olmadan işi icraata götürür və həmin ilin fevralında qətnamə qəbul edir. Məhkəmənin hakimi qətnaməsini bununla əsaslandırır ki, 1994-cü ildə Bakı Sənaye-Pedoqoji Texnikumunun direktoru Əhməd Vəliyev universitetin ləğvi haqda əmr imzalayıb. Amma reallıqda isə vəziyyət tamam fərqli olub. Belə ki, həmin dövrdə universitetin təsisçisi Əhməd Vəliyev yox, onun direktoru olduğu texnikum olub, həmin təhsil ocağının adından bu məsələdə çıxış etmək səlahiyyəti isə ona verilməyib. Universitet həmin əmrlə ləğv edilsə də, bundan sonra da bu özəl ali təhsil müəssisəsi fəaliyyət göstərib.
Buna baxmayaraq Əhməd Vəliyev öz istəyinə çatmaq yolunda uğurla addımlaya bilir. Bir sıra məhkəmə orqanları Əhməd Vəliyevin təsisçi olub-olmadığını araşdırmadan, onun universiteti ləğv etmək səlahiyyətininolub-olmadığını aydınlaşdırmadan Abdulla Abdullayevin əleyhinə qərarlar çıxarır. Paralel olaraq, Əhməd Vəliyev Abdulla Abdullayevin universitetə iddiasını özünə təhqir və böhtan hesab edərək hüquq-mühafizə orqanlarına ərizə ilə müraciət edir. Məhkəmə A.Abdullayevə qarşı Cinayət Məcəlləsinin 147.1-ci maddəsi ilə cinayət işi açır və aylıq qazancının 20 faizini dövlətə ödəmək haqqında 2006-cı ildə hökm çıxarır. Yəni artıq Əhməd Vəliyev deputat seçildikdən beş ay sonra məhkəmədə A.Abdullayevi onu təhqir etməkdə günahlandırmağa nail olub. Cinayət işi ilə bağlı Apellyasiya Məhkəməsinə şikayət edilir, ancaq hökm qüvvədə saxlanılır. Ali Məhkəmə isə Apellyasiya Məhkəməsinin qərarını yenidən araşdırmaq üçün özünə qaytaranda, Apellyasiya Məhkəməsində A.Abdullayevin xəstə olaraq yataqda yatmasına baxmayaraq, vəkilinin belə iştirakı olmadan keçirilən prosesdə onun adından protokola bəzi ifadələr yazılır. Əhməd Vəliyev artıq Univetsitetin rektoru kimi Abdullayevi 2005-ci ilin aprelində işdən kənarlaşdırır. Abdulla Abdullayev sonrakı proseslərdə də uduzur. Çünki artıq onun rəqibi deputat idi...
Mövzuya dair dərc etdiyimiz ötən yazılarımızda da biz dəfələrlə belə bir faktı vurğulamışdıq ki, hətta ölkəmizdə korrupsiyaya qarşı mübarizə aparıldığı bir vaxta belə bir çox kiçik, orta və iri ranqlı məmurlar rüşvətxorluq və digər korrupsiya əməllərindən əl çəkmirlər. Həm də son illər vəziyyət bir qədər də mürəkkəbləşib. Yəni, əgər əvvəllər rüşvət almaq məmurlar üçün yeganə "dolanışıq mənbəyi" hesab olunurdusa, artıq indi onlar korrupsiya yolu ilə qazandıqları pulları daha çox gəlir götürmək üçün iqtisadiyyatın gəlirli sahələrinə yatırmağa başlayıblar.
Bəziləri isə bu və ya digər şirkətlərə, əsasən özlərinə yaxın olan şəxslərin müəssisələrinə himayədarlıq edirlər. Təbii ki, bu da bazar iqtisadiyyatı şəraitində həm azad rəqabətə mane olur, həm də addımbaşı sadə vətəndaşların hüquqlarının tapdanması ilə nəticələnir.
Nə qədər qəribə olsa da, artıq ölkədə korrupsionerlər bu tip metodlardan istifadə etməyə başlayıblar. Bu xüsusda “Odlar Yurdu” Universitetinin rektoru Əhməd Vəliyevin də fəaliyyəti diqqətə layiqdir. Məlum olduğu kimi Əhməd Vəliyevin universitetdən əlavə sement zavodları, klinikaları, bankları və çoxlu sayda ticarət obyektləri də var ki, bütün bunlara o təhsildən yığdığı rüşvətlərin hesabına nail olub. Hələ iki il bundan öncə Təhsil Nazirliyinin həyata keçirdiyi məqsədyönlü yoxlamalar zamanı tesdənkənar qəbulun, imtahanlarda rüşvət hallarının bəzi özəl universitetlərdə adi normaya çevrildiyi aşkar olunmuşdu. Bu səbəbdən də öncə Müstəqil Azərbaycan Universiteti, Moskva Dövlət Açıq Universiteti, sonra isə Azərbaycan Beynəlxalq Universitetinin fəaliyyəti dayandırıldı. Həmçinin Təhsil Nazirliyinin ali təhsil müəssisələrində tədrisin keyfiyyətilə bağlı apardığı montorinq zamanı “Odlar Yurdu” Universitetində də ciddi nöqsanlar aşkarlanmışdı. Xüsusən bu ali təhsil müəssisəsində qanunsuz tələbə qəbulu hallarının daha çox olması müəyyənləşdirilmişdi. Lakin sonrakı proseslər Əhməd Vəliyevin hələ də kifayət qədər gücə malik olduğunu bir daha təsdiqlədi. Belə ki, “Odlar Yurdu” Universiteti bu dəfə də bağlanmaq təhlükəsini adlaya bildi. Təəssüflər olsun ki, aidiyyatlı qurumların bu universitetin rəhbərliyinə qarşı hələ də nümayiş etdirdikləri liberal münasibət, son nəticədə burada təhsil alan tələbələrin maraqlarına və ümumilikdə ölkənin təhsil siteminə ciddi zərbələr vurmuş olur. “Odlar Yurdu” Universitetində isə çeşidli özbaşınalıqlar bu gün də davam edir.
Və sual olunur: Mikayıl Cabbarov deputatı yıxa biləcəəkmi? Sadalanan faktları nəzərə alsaq, “yox” deməliyik. Amma... Bunu isə yeni nazir özü sübut etməlidir.
Geri qayıt