“Ermənistanın mövcud vəziyyətdən çıxış yolu hakimiyyətin başqa qüvvələrə ötürülməsidir”

Ermənistan blokunun rəhbəri Robert Köçəryan paytaxtın Erebuni inzibati rayonunda keçirilən seçkiqabağı mitinqdə bildirib ki, güclü lider və ordu olmadan ölkə tərəfdaşdan yükə çevrilir.

Ovqat.com erməni mediasına istinadən xəbər verir ki, Ermənistanın keçmiş prezidenti ölkəsinin müdafiə qabiliyyətinin aşağı düşməsini mövcud hakimiyyət tərəfindən daim sarsıdılan üç əsas amilə əsaslandırıb: “döyüşə hazır ordu, güclü lider və güclü müttəfiqdir”.

"Güclü lider və döyüşə hazır ordusu olmayan bir ölkənin güclü müttəfiqi ola bilməz. O, kimə lazımdır ki? Bu halda, siz tərəfdaş deyil, yüksünüz. Güclü müttəfiq olmadan isə təhlükəsizliyi tam təmin etmək çətindir. Kiçik ölkələrlə rəqabət apara bilərsiniz, amma böyük dövlətlərə gəldikdə, güclü müttəfiqə ehtiyacınız var. Sülhün düsturu budur", - deyə Köçəryan fəlsəfə “xırdalayıb”.

O, hazırkı hökumətin strateji tərəfdaşlarla münasibətləri qəsdən pozduğuna əmindir. Köçəryanın fikrincə, bu, cəmiyyətə ümidsizlik hissi aşılamaq və sonra onları bütün tələblərə əməl etməli olduqlarına inandırmaq üçün qəsdən edilir.

Silahlı Qüvvələrdəki vəziyyətlə bağlı Ermənistan blokunun lideri qeyd edib ki, ordu sürətini itirib və "təhlükəsizlik xidməti"nə çevrilib.

"Çünki silahlı qüvvələrin 90%-i sadəcə növbədədir. Təlimlər haqqında sonuncu dəfə nə vaxt eşitmisiniz? Parad yox, təlimlər yox. Heç nə edilmir. Müasir ordu sadəcə təhlükəsizlik funksiyasını yerinə yetirə bilməz", - deyə Köçəryan bildirib.

Onun sözlərinə görə, mövcud hakimiyyətin daim vəd etdiyi "sülh" yalnız düşmənin "xoşməramlılığından" asılıdır.

Köçəryan bildirib ki, mövcud təhlükəli yoldan imtina etməyin yeganə yolu dövlətin nəzarətini praqmatik qüvvələrə ötürməkdir.