Xəzərdə su azalır: Limanlar və enerji sektoru TƏHLÜKƏDƏ

Son illərdə Xəzər dənizinin səviyyəsinin mərhələli şəkildə aşağı düşməsi region ölkələrində narahatlığı artırıb.

“Cebheinfo.az”ın araşdırmasına görə, bu prosesin əsas səbəbləri iqlim dəyişiklikləri, temperaturun yüksəlməsi, buxarlanmanın artması və çay axınlarının azalmasıdır.

Xüsusilə Xəzərə ən çox su gətirən çaylarda axının zəifləməsi vəziyyəti daha da ağırlaşdırır.

Su səviyyəsinin azalması Azərbaycanın iqtisadi maraqlarına birbaşa təsir göstərə bilər. Xəzərdə yerləşən neft və qaz yataqları, balıqçılıq sahəsi və dəniz nəqliyyatı bu dəyişiklikdən zərər görə bilər.

Xüsusilə Bakı Beynəlxalq Dəniz Ticarət Limanı kimi strateji əhəmiyyətli limanların fəaliyyəti çətinləşə, gəmilərin hərəkət imkanları məhdudlaşa bilər. Bu isə tranzit və logistika imkanlarına mənfi təsir göstərə bilər.

Ekoloji baxımdan da vəziyyət ciddi hesab olunur. Suyun çəkilməsi bioloji müxtəlifliyə zərbə vurur, nadir balıq növlərinin, o cümlədən nərə balıqlarının sayını azaldır.

Eyni zamanda sahil zonalarında torpaqların şoranlaşması və səhralaşma riski artır ki, bu da kənd təsərrüfatına mənfi təsir edə bilər.

Mütəxəssislər hesab edirlər ki, mövcud vəziyyət uzunmüddətli perspektivdə daha böyük problemlərə yol aça bilər.

Buna görə də regional əməkdaşlığın gücləndirilməsi, su ehtiyatlarının birgə idarə olunması və ekoloji tədbirlərin genişləndirilməsi vacib sayılır.