Qanunsuzluğa görə bağlanan Qurtuluşu reklam edənlər...

Ajans.az-ın məlumatına görə, Maraqlıdır ki, həmin mərkəzdə bir sıra tanınmış ictimai şəxslər qonaq olub. Ceyhun Salmanov bu şəxslərdən özünün və mərkəzin reklamı üçün istifadə edib.

Deputatlar Ceyhun Məmmədov və Fazil Mustafa ilə bağlı xəbərləri daha əvvəl vermişdik.

Sırada mərkəzdə qonaq olan digər şəxsləri təqdim edirik.

Məşhur simalar arasında Milli Məclisin bir sıra deputatları, “Milli məclis” jurnalının redaktoru Qərənfil Mansurova, deputatlar Vüqar İsgəndərov, Hikmət Babaoğlu, Tahir Rzayev, psixoloq Aysel xanım, “Herba Flora” şirkətinin rəhbəri və “Herba Medical” klinikasının baş həkimi Füzuli Hüseynov, vəkil Tağı Hüseynov, fizioloq Rəşid Mahmudov, Kliniki Tibbi Mərkəzin baş toksikoloqu Azər Maqsudov və psixoterapevt Leyla xanım , DİN-in əməkdaşları Kəmalə Ələkbərova, Asim Babayev, Qadın və uşaqların innovativ maarifləndirilməsi təşkilatının rəhbəri Aynur xanım, Rusiyalı mütəxəssislər Aleksandr bəy və Alina xanım , ilahiyyatçı Yaşar Qurbanov və digər professorları görmək mümkündür.

Biz də, həmin şəxslərdən bir neçəsi ilə əlaqə saxladıq. Fizioloq Rəşid Mahmudov vaxt məhdudiyyəti yaşadığını və heç bir açıqlama verməyəcəyini bildirdi.

Lakin deputatlar Vüqar İsgəndərov, Tahir Rzayev və Hikmət Babaoğlu suallarımızı cavablandırıb.

Nə üçün onların arasından heç biri bu mərkəzin fəaliyyətini dərindən araşdırmağı düşünməyib?

Deputat Vüqar İsgəndərovun məsələyə münasibəti belə oldu:

O bildirib ki, “ Biz cəmiyyətdə baş verən hadisələrə biganə qalmırıq. Xüsusilə də, həssas mövzular, vətəndaşları narahat edən problemlərdə aktiv mövqeyimizi göstəririk. Subyektiv rəylərimizin cəmiyyət üçün faydalı olduğunu düşünürəm. “

Vüqar İsgəndərov açıqlayıb ki, o həmin mərkəzdə qonaq olub. Lakin özəl tanışlıqları olmayıb. Sadəcə digər həmkarları da iştirak etdiyi üçün o da getməyi özünə borc bilib.

“ Mən mərkəzdə olduğum müddət ərzində qeyri-adi, xoşagəlməz, gərgin anlara şahid olmamışam. Mərkəzin üzvləri ilə bir-bir görüşmüşük. Yaradılan şərait ilə də tanış olmuşam. Müalicə üsulları, qida, təmizlik, idman proqramları, asudə vaxtın səmərəli keçirilməsi və digər xidmətləri əyani gördük. Lakin məni narahat edən heç bir hadisəyə rast gəlməmişəm.

Deputat qeyd edib ki, reabilitasiya mərkəzində baş verən sonrakı qalmaqallar ilə bağlı araşdırma aparması hüquq-mühafizə orqanlarının işidir. Lakin iştirak edilən bütün tədbirlərdə əsas düşüncəmiz zərərli vərdişlər ilə düzgün mübarizə aparmaqdır.

“Tək missiyamız narkomaniyaya qarşı mübarizə qurumlara dəstək göstərmək və yanlarında olmaqdır. Qurtuluşda baş verənlər konkret hadisədir. Bu da araşdırılır. Həmin görüşdən sonra mən Ceyhun Salmanovu bir daha görməmişəm. Özüm də mediadan öyrənmişəm ki, cinayət halları aşkar edilib. Ən son hadisələr ilə bağlı fikirlərimizi yalnız məhkəmədən sonra bildirə bilərik.” deyə, o söyləyib.

Qonaq qismində iştirak etmiş deputatlardan biri də deputat Hikmət Babaoğlu olub.

Hikmət Babaoğlu açıqlayıb ki, Reabilitasiya mərkəzinə rəhbərlik tərəfindən qonaq dəvət edilib.

“ Mən yalnız narkotik asılılığından əziyyət çəkən şəxslərə yaradılan şəraitlə yaxından tanış olmaq üçün oraya getmişəm. Lakin indi Ceyhun Salmanov həbs edilibsə, bunu mən öncədən təxmin edə bilməzdim. Orada iştirakımı danmıram. İctimai nüfuzuma görə dəvət ediblər. “

Həmçinin, deputat qeyd edib ki, Ceyhun Salmanovla özəl tanışlığı yoxdur. Sadəcə həmkarı vasitəsilə tanış olublar. Hətta qurumun özəl olmadığını, dövlətə məxsus olduğunu düşünüb.

“ O görüşlə hər şey başladığı kimi bitib. Nə əvvəl, nə də sonra qarşılaşmadıq.” deyə, Hikmət Babaoğlu fikirlərini deyib.

Deputat Tahir Rzayev də orada illər öncə olduğunu deyib.

“ Mənim son olanlardan xəbərim var. Lakin illər öncə, orada olmuşam. Qeyd edim ki, mərkəz müsbət xidmətləri ilə seçilib. 4-5 il əvvəl orada olanda nə qədər şəxsin narkomaniyadan əziyyət çəkdiyinin şahidi oldum. Reabilitasiya mərkəzinin belə müsbət addım atması təqdirəlayiqdir.”

O, Ceyhun Salmanovun sonrakı proseslərdə adının hallanmasına da münasibət bildirib.

“ Ceyhun Salmanovun doğru və ya səhv hərəkətlərini istintaq müəyyən edə bilər. Amma belə mərkəzin fəaliyyəti ölkə üçün vacib idi. Orada yüzlərlə şəxs sağlam həyata qayıdıb. Ceyhun bəyin müavinləri belə bir zamanlar zərərli vərdişlərdən əziyyət çəkən şəxslər olub. Amma sağalaraq, işlə belə təmin olunublar.”

Tahir Rzayev deyib ki, Ceyhun Salmanovun qanunsuz əməllərinə yalnız qurumlar cavabdehdir. Ancaq bu tip mərkəzlər ölkə üçün vacibdir.