Son günlər ölkədə parlamentin tərkibi geniş müzakirələrə səbəb olub. Ramiz Mehdiyev məsələsi ortaya çıxandan sonra onun yaxın dairəsinə daxil olan deputatların adının mediada hallanması siyasi çevrələrdə dəyişikliklərin qaçılmaz olacağı ilə bağlı fərziyyələr doğurub. Uzun müddət vətəndaşların gündəlik problemlərinə lazımi diqqət yetirməyən parlament üzvlərinin fəaliyyəti onsuz da cəmiyyətdə narazılıq yaradırdı. Belə bir fon isə həm parlamentin yenilənməsi, həm də növbədənkənar seçkilərin keçirilməsi barədə iddiaları aktuallaşdırır.
Xalqın səsini təmsil etməkdə çətinlik çəkən deputatların parlamentdən kənarlaşdırılacağı, fövqəladə seçkilərin keçiriləcəyi barədə iddialar dolaşır.
Xatırladaq ki, Prezident Administrasiyasının sabiq rəhbəri, akademik Ramiz Mehdiyevin dövlətə xəyanət, hakimiyyəti zorla ələ keçirmə və cinayət yolu ilə əldə edilmiş əmlakı leqallaşdırma maddələri ilə ittiham edilməsi, onun ev dustaqlığına məhkum edilməsi və şəxsi saytının bloklanması ölkə daxilində və xaricində geniş əks-səda doğurub.
Qeyd edilib ki, Mehdiyev rəhbərlik edəcəyi Dövlət Şurasında təmsil olunacaq şəxslərlə bağlı məlumatı da Rusiya ilə bölüşüb. Bəzi iddialara görə, xaricdə "söyüş müxalifəti" adlanan dəstəni bu komanda maliyyələşdirib və onlara yüksək vəzifəli şəxslərlə bağlı "ifşaedici" məlumatlar təqdim edib. Ehtimallar arasında Rusiya xüsusi xidmət orqanları ilə sıx əlaqə və dövlət sirrinin satılması da var.
AĞ Partiyanın sədri Tural Abbaslı Sherg.az-a açıqlamasında deyib ki, Ramiz Mehdiyevin dövlət strukturlarında şəxsi təsir imkanlarının olması danılmaz faktdır. O, illərlə dövlətin ən yüksək postlarından birində fəaliyyət göstərib və bu müddət ərzində müxtəlif sahələrdə çalışan kadrlar yetişdirib:
“Onun yetişdirdiyi, müxtəlif vəzifələrə yerləşdirdiyi kadrlar hələ də aktiv vəzifə başındadırlar. Heç şübhəsiz ki, Milli Məclisdə də ona şəxsən yaxın olan, zamanında onun sayəsində siyasətə gəlmiş, mandat almış kifayət qədər deputat var. Lakin bunu əlimizdə bayraq edərək Mehdiyevə salam verən hər kəsi xain elan edə, onun dönəmində vəzifə alan məmurların hamısından istefa tələb edə bilmərik. Bu, dövlətçilik baxımından düzgün yanaşma deyil.
Düzgün yanaşma odur ki, insanları yalnız qanunsuz əməllərinə görə məsuliyyətə cəlb edək, şəxsi hörmət və ya əvvəlki tabeçilik bu prosesi qarışdırmamalıdır. Dövlət idarəçiliyində əsas prinsip qanunçuluqdur. Yalnız qanunsuz əməllərə görə məsuliyyətə cəlb olunmaq mümkündür; şəxsi hörmət və ya keçmiş tabeçilik, keçmişdə verilmiş mandat və ya vəzifələr bu prosesi qarışdırmamalıdır. İnsanlar Ramiz Mehdiyevə şəxsi hörmətdən əlavə, Prezident Administrasiyasının rəhbəri kimi ona tabe olub, tapşırıqlarına etimad göstərib”.
Ramiz Mehdiyevin mümkün çevriliş cəhdinə gəldikdə isə T.Abbaslı qeyd edib ki, vəziyyət olduqca ciddi qiymətləndirilməlidir. Əgər parlamentdə təmsil olunan deputatların şəxsi iştirakı və ya dolayı dəstəyi aşkar olunarsa, onların qanunvericilik çərçivəsində məsuliyyətə cəlb olunması, hətta mandatlarının ləğvi mümkündür:
“Hətta əgər bu cür şəxslər çoxluq təşkil edirsə, bu, parlamentin buraxılmasına və növbədənkənar seçkilərin keçirilməsinə səbəb ola bilər.
Parlamentdə xalqın etimadını doğruldan, seçicilərin legitimliyini tanıyacağı şəxslər seçilməlidir. Xalqın iradəsini nəzərə almadan formalaşdırılan parlament xalqın iradəsini ifadə edə bilməz. Əks halda dövlət idarəçiliyində yaşanan anlaşılmazlıqlar Milli Məclisdə təmsil olunan deputatlarla bağlı da bu cür şübhələr yaradır. Öz gücünü xalqdan alan parlament dövlət və dövlətçiliyin keşiyində daha möhkəm dura bilər. Nəinki hansısa şəxslərə borclu olan, onların sayəsində mandat alan, xalqın qarşısında gözükölgəli olan deputatlardan formalaşan parlament”.
Qeyd edək ki, partiya sədri məhz Ramiz Mehdiyevlə əlaqələri olan deputatlara görə yox, ümumilikdə parlamentdə oturan deputatların heç birinin xalqın etimadını doğrultmadığı üçün 7-ci çağırış parlamentin buraxılmasını və erkən seçkilərə gedilməsinin vacibliyini vurğulayıb: “Seçicilərin legitimliyini qəbul edəcəyi bir parlament formalaşdırmaq lazımdır. Lakin qərarı biz vermirik, müxalifət olaraq biz sadəcə öz təkliflərimizi irəli sürə bilərik. Son qərar iqtidarındır!”.
