Bir tərəfdə satdığı mülkün dəyərini istəyən vətəndaş, digər tərəfdə isə fövqəladə hallar naziri Kamaləddin Heydərovun ailə holdinqi "Gilan" dayanır. 15 il öncə Azərbaycan vətəndaşından mülkünü alıblar, halalaşacaqlarını bildiriblər. Lakin bu günə qədər vətəndaşın mülkünə görə sövdələşmə məbləği ödənməyib. Ən pisi odur ki, bu haramçılıq məhkəmə qərarlarının möhürləri arxasında itib-batıb.

İllərlə Azərbaycan məhkəmələri "fövqəlnazir"in ailə şirkətinin haram əməlini “qanuni don”a salmaq üçün əllərindən gələni edilbər. Hakimlər, katiblər, ekspertlər eyni ssenarinin aktyorlarına çevrilmişdi.

Və nəhayət, Avropa İnsan Haqları Məhkəməsi “Gilan”ın xeyrinə çıxarılan bütün qərarları qanunsuz sayıb, işi Azərbaycana qaytarıb. Ali Məhkəmə AHİM qərarını əsasında iş üzrə ölkədaxilində çıxarılmış bütün qətnamə və qərarları ləğv edib və işə yenidən baxılması üçün Bakı Apellyasiya Məhkəməsinə qaytarıb.

Bir daha qeyd edək ki, söhbət alqı-satqı predmeti olan mülkə görə dəyərinin ödənilməməsi və saxta sənədlərlə vətəndaş Aygün Mahmudovanın əmlakının ələ keçirilməsindən gedir.

Məsələnin ən pis tərəfi odur ki, AHİM-dən qayıtmış bu iş üzrə yenidən ədalətli məhkəmə araşdırması aparılmır. Aygün Mahmudovanın vəkilinin vəsatətləri heç bir əsaslandırma aparılmadan təmin olunmur və ya baxılmamış saxlanır. Bu gedişat isə Aygün Mahmudovanın “Gilan” MMC ilə uzun illərdir davam edən hüquqi mübarizəsi bu dəfə də biabırçı və qanunsuz qərarlar verilməklə sonuclana bilər.

Saxtalaşdırılmış sənədlər, itirilmiş mülkiyyət

Hər şey 2010-cu ilin payızında, Aygün Mahmudovanın özünə məxsus əmlakın sənədlərinin saxtalaşdırılaraq “Gilan” MMC tərəfindən qanunsuz ələ keçirildiyini aşkar etməsindən sonra başlayıb.

O, Bakı şəhəri Nəsimi Rayon Məhkəməsinə müraciət edərək, alqı-satqı müqaviləsinin etibarsız sayılmasını tələb edib. Hakim Elmar Kərimovun 14 oktyabr 2010-cu il tarixli qərarı ilə Aygün Mahmudovanın iddiası qismən təmin olunub, “Gilan” MMC ilə bağlanmış saxta alqı-satqı müqaviləsi etibarsız elan edilib, daşınmaz əmlakın dövlət qeydiyyatına dair sənədləri ləğv olunub. Lakin bir neçə ay sonra, 2011-ci ilin martında, Bakı Apellyasiya Məhkəməsi (hakimlər X.Məmmədov, K.Bədəlov və E.Nəbiyev) “Gilan” MMC və Bayramova Aidə Ənvər qızının apellyasiya şikayətlərini qismən təmin etdi, Mahmudovanın xeyrinə olan hissələr ləğv olundu.

Üstəlik, məhkəmə Bayramova Aidə Ənvər qızının Aygün Mahmudovanın adından verilmiş ümumi etibarnamə ilə əmlak üzərində apardığı əməliyyatlarda cinayət əlamətləri ola biləcəyini qeyd edərək, Xüsusi qərardadla Baş Prokurorluğa müraciət etdi.

Ancaq 14 il keçməsinə baxmayaraq, bu qərardad üzrə heç bir istintaq aparılmayıb.

Aygün Mahmudova Ali Məhkəməyə kassasiya şikayəti verərək, apellyasiya instansiyasının həm maddi, həm də prosessual hüquq normalarını pozduğunu bildirib.

Lakin hakim Ələsgər Əliyevin sədrliyi ilə Ali Məhkəmənin Mülki Kollegiyası onun şikayətini rədd edib.

Beləcə, Azərbaycan məhkəmələri səviyyəsində Aygün Mahmudovanın ədalət axtarışı bitib. O, 2011-ci ilin oktyabrında AİHM-ə müraciət edib.

AİHM 18 yanvar 2024-cü il tarixli qərarı ilə Aygün Mahmudovanın Konvensiyanın 6-cı maddəsi üzrə ədalətli məhkəmə araşdırması hüququnun pozulduğunu tanıyıb.

Bu qərardan sonra Ali Məhkəmənin Plenumu 9 oktyabr 2024-cü ildə verilmiş qərarı ilə 2011-ci ildə verilmiş Bakı Apellyasiya Məhkəməsinin qətnaməsi və Ali Məhkəmənin qərarını ləğv edib, iş yenidən baxılması üçün Bakı Apellyasiya Məhkəməsinə qaytarılıb.

Plenum qərarında açıq şəkildə bildirilib ki, apellyasiya instansiyası iddianın hüquqi nəticələrini bərpa etmədən, mülkiyyətin qaytarılması və ya əvəzinin ödənilməsi məsələsini həll etmədən qərar çıxarıb, bu isə Mülki Məcəllənin 337.5-ci maddəsinə ziddir.

Aygün Mahmudova deyir ki, hazırda iş Bakı Apellyasiya Məhkəməsinin Mülki Kollegiyasında hakimlər Fərrux Qasımov, Günay Axundova, Leyla Əliyevanın icraatındadır. Onun sözlərinə görə vəkili 2025-ci ilin sentyabr-oktyabr aylarında məhkəməyə bir-birinin ardınca vəsatətlər təqdim edib:

2236 nömrəli vəsatətlə sənədli təftiş və xəttşünaslıq ekspertizasının təyin edilməsi,

2243 nömrəli vəsatətlə vacib sənədlərin tələb edilməsi,

2252 və 2253 nömrəli ərizələrlə saxta kassa orderi və sübutların təmin edilməsi barədə olub.

Lakin məhkəmə bu sənədlərin heç birinə heç bir əsas gətirmədən baxmayıb!

Üstəlik, 11 və 19 sentyabr tarixli müvəqqəti təminat tədbirləri barədə vəsatətləri də heç bir əsaslandırma aparmadan rədd edilib.

Aygün Mahmudova bir daha ailəsinin 17 ildir ədalət axtarışında olduğunu vurğulayaraq ölkə rəhbərliyindən bu işin şəxsi nəzarətə götürülməsini və “Gilan” MMC-nin saxtakarlıqlarına hüquqi qiymət verilməsini xahiş edir:

“Sizdən xahiş edirəm ki, bu özbaşınalığa son qoyasınız. Mən “Konstitusiya və Suverenlik İli”ndə ədalət istəyirəm”.

Aygün Mahmudova Məhkəmə Hüquq Şurasının sədri İnam Kərimova da müraciət edərək Bakı Apellyasiya Məhkəməsində keçirilən prosesin qanuni şəkildə keçiriməsinin təmin olumasını istəyib.

Musavat.com