Xəbər verdiyimiz kimi, oktyabrın 25-dən etibarən ölkə üzrə heyvan bazarlarının müvəqqəti bağlanması nəzərdə tutulur.
Bəs, heyvan bazarlarının müvəqqəti bağlanması bazar iqtisadiyyatına necə təsir edəcək?
Mövzu ilə bağlı Redaktor.az-a açıqlamasında kənd təsərrüfatı üzrə ekspert Akif Nəsirli bildirdi ki, bu, çox vacib və real iqtisadi nəticələri olan məsələdir:
"Əgər 25 oktyabrdan etibarən ölkə üzrə heyvan bazarlarının müvəqqəti bağlanması qərarı qüvvəyə minirsə, bu, həm qısamüddətli, həm də ortamüddətli dövrdə kənd təsərrüfatı bazarına və xüsusilə ət qiymətlərinə ciddi təsir göstərəcək. Heyvan bazarlarının bağlanması dabaq və digər yoluxucu xəstəliklərin yayılmasının qarşısını almaq məqsədi daşıyır. Bu, baytarlıq və sanitariya baxımından zəruri addımdır, lakin iqtisadi cəhətdən müvəqqəti təchizat zəncirinin pozulması deməkdir".
Müsahibimiz əlavə etdi ki, heyvan bazarları bağlandığı üçün canlı heyvan ticarəti dayanır.
"Kəsim üçün heyvanların bazara gətirilməsinin məhdudlaşdırılması ət təklifinin azalmasına səbəb olur. Satıcıların bir hissəsi rəsmi kanallar xaricində fəaliyyət göstərə bilər, lakin bu həcm baxımından məhdud olacaq. Təklifin azalması bazarda təbii qiymət artımına gətirib çıxarır. Hazırda mal ətinin 1 kiloqramının orta qiyməti təxminən 21-22 manatdır. Noyabr ayında bazarların bağlanması və təklifin azalması fonunda qiymətlərin 25–27 manata yüksəlməsi ehtimalı yüksəkdir, xüsusilə Qurbanlıq və bayram ərəfəsində 30 manat həddinə yaxınlaşa bilər.
Heyvan satan fermerlərin bazara çıxmaması dövriyyəni dayandırır və kənd yerlərində likvidlik böhranına səbəb ola bilər. Kiçik fermerlər üçün bu, ciddi zərbədir. Qadağa uzun müddət davam edərsə, ət və süd məhsullarında qıtlıq yarana, xəstəlik səbəbi ilə bəzi heyvanlar itirilə və ümumi mal-qara sayı arta bilər. Uzun müddət ərzində, dekabr-yanvar aylarında, heyvan sayının azalması və idxaldan asılılıq səbəbindən qiymətlərin 28–30 manat arasında olması gözlənilir. Dövlət müdaxiləsi həyata keçirilərsə, idxal və nəzarət tədbirləri ilə qiymətlərin 23-25 manat aralığında sabitləşəcəyi ehtimal olunur", - deyə Akif Nəsirli bildirdi.
