Ana Vətən Partiyasının sədri, sabiq deputat Fəzail Ağamalının Ramiz Mehdiyevə məktubu yayımlanıb.

17 aprel, 2018-ci ildə yazılan məktubda
sabiq deputat Ramiz Mehdiyevi yubileyi münasibətilə təbrik edib onun ünvanına xoş fikirlər yazıb.
Xatırladaq ki, Prezident Administrasiyasının sabiq rəhbəri, AMEA-nın sabiq prezidenti, akademik Ramiz Mehdiyev barəsində Səbail Rayon Məhkəməsinin qərarı ilə 4 aylıq ev dustaqlığı qətimkan tədbiri seçilib.

O, Cinayət Məcəlləsinin 274-cü (Dövlətə xəyanət), 278.1-ci (Hakimiyyəti zorla ələ keçirmə və ya onu zorla saxlama) və 193-1-ci (Cinayət yolu ilə əldə edilmiş pul vəsaitlərinin leqallaşdırılması) maddələri ilə ittiham olunur.
R.Mehdiyevə qarşı çıxışlarla son günlər daha çox gündəmə gələn Fəzail Ağamalının bu məktubunun üzə çıxması müzakirələr yaradıb.

Həmin məktubla bağlı Ana Vətən Partiyasının sədri, sabiq deputat Fəzail Ağamalı “Cebheinfo.az”-a açıqlamasında bildirib ki, Ramiz Mehdiyev "Moskvanın adamı" kimi prezident olmaq istədiyi üçün onun əleyhinə çıxışlar edib:

“Bizim də müdafiə etdiyimiz, təbliğatını apardığımız yeni nəslin nümayəndəsi İlham Əliyev var idi. Prezidentimiz də Ulu öndər Heydər Əliyev idi. Mən kimin yanında olmalı idim? Təbii ki, Heydər Əliyevin və İlham Əliyevin yanında olmalı idim. O isə qarşıdan gələn prezident seçkilərində bəzi adamlarla birıəşib özünü prezident görmək istəyirdi. Ancaq mən onu ifşa etdim. İllər öncə mən ona bu məktubu göndərmişəm. Onun özü də 12 ildir ki, kitablarda, çıxışlarda “cənab Prezident İlham Əliyev” deyib dururdu. O da Ulu Öndərimizin əleyhinə açıq şəkildə getmirdi. Bizdə belə bir düşüncə var idi ki, deyəsən, haqqın yoluna gəlib, İlham Əliyevin prezidentliyini qəbul edir, onun tapşırıqlarını yerinə yetirir. Ancaq biz onun içində olanı bilmirik.

Nə düşünür, necə fikirləşir, gələcək planları necədir? O, bunu heç kimə demir və mənim də xəbərim yoxdur. Yubileyi oldu və mən də götürüb yazdım ki, yubiley münasibətilə sizi təbrik edirəm. Burada nə var? Siyasətdə adi bir şeydir. Burada nə əqidəsizlik, nə dediyi sözdən dönmək var. Mən o sözü 2020-ci ildə də dedim. Birinci mən məsələ qaldırdım. Müəllif yazım getdi və “Yeni Müsavat” qəzetində dərc olundu. Ondan sonra deputatlar da, digər şəxslər də buna qoşuldu ki, yaxşı, sən nə istəyirsən, prezident olmaq istəyirsən? Qarşında prezident var. Azərbaycan Prezidenti deyilsən, AMEA-nın prezidentisən, amma bir daha bu dövlətə xəyanət etmək istəyirsən. Moskvanın planlarını yerinə yetirməyə çalışırsan. Bu da nəticəsidir".

Partiya sədri bildirib ki, 2000-ci ildə “Şərq” qəzetində “Ramiz Mehdiyev İlham Əliyevə qarşı” məqaləsi dərc olunub:

"Gənc politoloqlar qrupunun yazısı dərc olunub ki, onun müəllifi mən idim. O məktubu göndərdik, həmin qəzetdə dərc olundu. 2001-ci ildə bir neçə qəzetdə də müzakirələr gedib. Ondan sonra hər zaman sözümün üstündə durmuşam. Yalnız ona qarşı yox, ondan əvvəl Surət Hüseynova, Hüseyn Abdullayevə qarşı fikirlərimin üstündə durmuşam. Çünki Hüseyn Abdullayev də dövlətin əleyhinə sərt çıxışlar edirdi, plan hazırlanmışdı. Ona qarşı da həyatımı riskə qoydum. Çünki Hüseyn Abdullayevin ətrafında onlarla silahlı adam var idi. Dövlətçilik naminə əmək və əhalinin sosial müdafiə naziri olaraq işləyirdim və Surət Hüseynovla üz-üzə gəldik. Könüllü şəkildə Ulu Öndərimizə müraciət edib istefamı xahiş etdim.

Bu gün də Ramiz Mehdiyevi xain hesab edirəm, onun Azərbaycanın müstəqilliyinə, azadlığına, dövlətçiliyinə sədaqətlə xidmət etməklə heç bir əlaqəsi yoxdur. O təpədən dırnağadək, bütün ruhu ilə Moskvaya, Kremlə bağlı adamdır. Mən hər zaman bunu demişəm. İndi bir məktub gedib, mən onu təbrik etmişəm, onu böyük bir hadisəyə çevirməyə çalışırlar. Görək sabah nə böhtan atmağa çalışacaqlar. Mən çox ciddi mübarizələrlə bu yaşa çatmışam. Allahdan başqa heç kimdən qorxum yoxdur. Bir də cənab Prezidentimizə bir vəfa borcum var. Ömrümün sonuna qədər yerinə yetirməyə çalışacağam. Özüm də, rəhbərlik etdiyim partiya da...”