Həbsdə olan biznesmen Samvel Karapetyan yeni yaradılan “Bizim yol” Partiyasına rəhbərlik edəcək.

“Cebheinfo.az” xəbər verir ki, bu barədə onun vəkillərindən biri Aram Vardevanyan Karapetyanın saxlandığı təcridxananın qarşısındakı yürüşdən sonra bildirib.

Vardevanyanın sözlərinə görə, oktyabrın 18-də səhər saatlarında Karapetyan mitinq iştirakçılarından yeni partiyaya rəhbərlik etməyə hazır olduğunu çatdırmağı ondan xahiş edib.

“Hərəkat partiyaya çevrildiyindən sədri olmağa hazırdır”, - vəkil bildirib.

Bu arada Samvel Karapetyan və iki arxiyepiskop Baqrat Qalstanyanla Mikael Ajapaxyanın saxlandığı bina qarşısında toplaşanlar “Azadlıq!” şüarları səsləndiriblər.

Mitinqin sonunda təşkilatçılar Erməni Apostol Kilsəsinə dəstək üçün Eçmiədzinə ziyarət etmək qərarına gəliblər.

"Biz Eçmiədzinə ziyarətinə gedəcək və onun müdafiəsiz olmadığını göstərəcəyik. Ermənilər Sardarapat döyüşündə olduğu kimi Eçmiədzini də müdafiə edəcəklər", - hərəkatın koordinatoru və həbsdə olan biznesmenin qardaşı oğlu Narek Karapetyanın bildirib.

Hərəkat iştirakçıları saat 17:30-da Eçmiədzin Ana taxtında toplaşacaqlar.

Qeyd edək ki, Samvel Karapetyanı dəstəkləyən etirazçılar və həbs olunan din xadimləri Azadlıq meydanından Milli Təhlükəsizlik Xidmətinin binasına gəliblər. Orada keçirilən aksiyada hərəkat Ermənistanda rejim dəyişikliyi planını təqdim edib.

Xatırladaq ki, Samvel Karapetyan avqustun 13-də “Bizim yol” hərəkatının yaradıldığını bəyan etmişdi. “Taşir” Şirkətlər Qrupunun sahibi Samvel Karapetyan Ermənistanda hökumətin hücumları fonunda Erməni Apostol Kilsəsinə (AAC) dəstək verdiyini bəyan etdikdən sonra ona qarşı ittiham irəli sürülüb və həbs edilib.

Biznesmen özü ittihamları rədd edərək Ermənistan rəhbərliyini səriştəsiz adlandırıb. Onun kilsəyə dəstək verməsi Baş nazir Nikol Paşinyanı qəzəbləndirib. O, sosial şəbəkələrdə kilsənin ruhaniləri və xeyriyyəçilərinin ünvanına bir neçə təhqir yazıb.