“2000-ci ildə cənab Heydər Əliyev xəstə olanda boşluq yaranmışdı, hakimiyyət Ramiz Mehdiyevin ümidinə qalmışdı. Zakir Qaralov, Rüstəm Usubov həmin vaxt birbaşa Ramiz Mehdiyevin göstərişi ilə mənim boynuma 8 ölüm işi qoymuşdular. Müstəntiq Arzu Quliyev deyirdi ki, sənin işini bitirib həbsxanaya göndərəcəyəm, Zakir Qaralov mənə söz verib. Dedim ki, məni buraxacaqlar, səni isə işdən çıxaracaqlar. Elə də oldu. Mənim barəmdə beş maddə ilə cinayət işi qaldırmışdılar. Heydər Əliyev sağalandan sonra Zakir Qaralova sual verdi ki, hacı Qalibi niyə tutmusan? O da dedi ki, hacı Qalib polisə sillə vurub. Heydər Əliyev isə demişdi ki, Dəmiryol Vağzalında gündə otuz polis döyürlər, heç onları tutmursan... Bir saatın içində məni buraxdılar, əmimi saxladılar. Razılaşmadım, əmimi də onlardan aldım. Ramiz Mehdiyev Qurban bayramı günü adam göndərib, kirayədə yaşayan kiçik oğlum Əlihüseyni evdən çıxarıb, əvvəlcə anasını təhdid ediblər, oğluma yumruq vurublar ki, 60 manat “supulu” borcunuz var. Qurban bayramı günü oğlumu Ramiz Mehdiyev həbs etdirib. İndi də Qod Nisanovu ortaya atıblar. Ağasif Şakiroğlu öz dəstəsi ilə Qod Nisanovu aldadıb. Məhkəmə gedə-gedə Bilgəhdə evlərim olan ərazinin aşağı hissəsini Qod Nisanova satıblar. Nisanovun adamları mənə zəng edib, onun adından dedilər ki, guya bu yeri Qod Nisanov üçün başqa vəzifəli şəxsdən alıblar. Kimi aldadırsınız? Vəzifəli şəxs torpaq satır? 30 ildir, bu söhbət gedir. Ağasif Şakiroğlu guya Rəsul Quliyevin nümayəndəsidir. Rəsul Quliyevin qızı Bakıya gəlib ki, pulu aparsın. Şəkillərini çəkib paylaşırlar ki, guya Heydər Əliyevin məzarını ziyarətə gəliblər. Rəsulun qızı kimdir ki, Ağasif Şakiroğlu onu dövlət xadimi kimi təqdim edir? Bu işlərə cavabdeh olanlar hara baxırlar? Camaat Ramiz Mehdiyevdən danışır, halbuki hamınız bilirsiniz, Rəsul Quliyev ondan da böyük vətən xainidir, 2005-ci ildə işarə gözləyirdi ki, dövlət çevrilişi etsinlər”.

Bu sözləri Pravda.az-a açıqlamasında sabiq deputat, Şeyxülislam Allahşükür Paşazadənin qudası Qalib Salahzadə deyib.

“Ramiz Mehdiyev çalışıb ki, mənim kimi adamları dövlətdən narazı salsın. Oğlum gəlib demişdi ki, ata, səni 26 apreldə həbs edəcəklər. Dedim ki, oğlum, qələt edirlər, Ramiz də qələt edir, Zakir də, Rüstəm də. Məni bir nəfər həbs etdirə bilər. O isə məni tanıyır. Bilir ki, xəyanətkar deyiləm. Onlar kimi pul xatirinə dostlarıma xəyanət etməmişəm. Kişi kimi yaşamışam, kişi kimi də öləcəyəm. Gərək, Ramiz Mehdiyevə bu yaşında bütün bunlar olunaydı, hacı Qalib də ürəkdən sevinəydi. Mən Allahın gücünü bilirəm. Bilirəm ki, Allah belə adamları mütləq cəzalandıracaq. İndi oğlum evdə oturub, heç yerdə işləmir. Nəyə görə? Çünki Mehdiyevin ətrafındakı adamlar elə şaiyələr yayırlar ki... Oğlum sakit, sudan da təmiz adamdır. Gözlədilər ki, hökumətdən narazılıq edim. Xeyr, dövlətdən, Prezidentdən narazı deyiləm. Dövlət istəsə, evləri sökərdi. Amma toxunmadılar. Məni təxribata çəkmək istədilər. Ramiz Mehdiyevin Prezident Administrasiyasında işə götürdüyü xadiməni belə qovmaq lazımdır. Çay paylayan adamı icra başçısı qoyub. Mən bu günü gözləyirdim. Cənab Prezidentin müharibəyə başı qarışmışdı, bunlar da əl-qol açmışdılar. Cənab Prezidentin çörəyini yeyib, Prezident bunun üçün nə istəsən, edib... Ramiz isə altdan-altdan xəyanət edib. 2010-cu ildə mən deputat seçiləndə Ramiz Mehdiyevlə Zeynal Nağdəliyev məni kabinetlərinə dəvət etdi. Dedilər ki, fikirləşirik, sənə deputat olmağa icazə verək, ya yox. Ramiz Mehdiyev mənimlə elə danışırdı, elə bil, bu, ölkənin rəhbəridir. Sonra parlamentdəki qohumlarından biri yaxınlaşdı ki, səni kişinin yanına aparım. Bəyəm bunlar bilmirlər ki, mən kiməm, qabiliyyətim nəyə çatır? Ramiz Mehdiyevlə heç vaxt görüşməmişəm. Həyatımda iki dəfə Mehdiyevi görmüşəm. Özü qapıma gəldi, Bilgəhdəki torpaqlardan istədi, mən vermədim. Elə buna görə 1994-cü ildən mənimlə düşmən olub. Zakir Qaralova da torpaq vermədim. Hasarlamışdı, sökdüm. İndi də Azərbaycanda adam tapa bilmədilər, Moskvadan Qod Nisanovu gətiriblər? Düşünüblər ki, Nisanov milyarderdir, hacı Qalib ondan qorxar. Mənim Bilgəhdə elə üç-beş nəfər milyarderim var də. Mən milyarder görməmişəm? Qod Nisanov mənə heç nə edə bilməz", - Q.Salahzadə deyib.