Məlum olduğu kimi, Prezident Administrasiyasının sabiq rəhbəri, Azərbaycan Milli Elmlər Akademiyasının keçmiş prezidenti Ramiz Mehdiyev dövlət hakimiyyətini ələ keçirməyə cəhd, dövlətə xəyanət və cinayət yolu ilə əldə edilmiş əmlakı leqallaşdırma ittihamları ilə həbs edilib.
Onun həbsi fonunda R.Mehdiyevə məxsus əmlaklar və adının hallandığı şirkətlər yenidən gündəmə gəlib. İddialara əsasən, sabiq məmurun gəlini “Bank BTB” ASC-nin əsas səhmdarıdır və 75 faiz paya sahibdir. Bu isə bankın 50 milyon manatlıq nizamnamə kapitalının böyük hissəsinin ona məxsus olması deməkdir.
Qeyd olunur ki, “Bank BTB” ASC eyni zamanda “BTB Lizinq” və “BTB Kapital İnvestisiya Şirkəti” ASC-lərin də təsisçisidir. Məlumata görə, son iki gündə baş verən hadisələrdən sonra müştərilər bankdakı əmanət və depozitlərini geri çəkməyə başlayıblar.
“Cebheinfo.az”-a açıqlamasında “Bank BTB” ASC-nin Marketinq departamentinin rəhbəri Aynur Nurəliyeva bildirib ki, təbii olaraq müştərilər arasında müəyyən narahatlıq yaranıb:
“Mediada son iki gün ərzində müxtəlif neqativ məlumatlar yayılır. Təbii ki, bankın müştəriləri loyallıqlarını qorumağa çalışsalar da, öz vəsaitlərinin təhlükəsizliyi ilə bağlı kifayət qədər narahatdırlar. Hazırda hər şey individual qaydadadır. Hər bir müştəri banka müraciət etdikdə, bankın adından asılı olmayaraq, istənilən vaxt istənilən qərarı verə bilər. Yəni ya bizimlə tərəfdaşlığa davam edir, ya da müqaviləyə xitam verərək qərarını bildirir. Bank olaraq biz müştərilərin bütün qərarlarına hörmətlə yanaşır və onları anlayışla qarşılayırıq”.
O qeyd edib ki, hər bir müştəri banka müraciət etdikdə, istənilən vaxt istənilən qərarı vermək hüququna malikdir:
“Müraciətlərin sayı elə də çox deyil. Əksinə, bankımıza dəstək göstərməyə, yaranmış vəziyyəti anlayışla qarşılamağa hazır olan müştərilərimiz var. Hətta elə müştərilər var ki, bizə gözəl sözlər deyir, təşəkkürlərini bildirir.
Həmçinin, bu dövrdə bizə dəstək göstərmək, tərəfdaşlığı davam etdirmək arzu və niyyətinin olduğunu göstərirlər. Eyni zamanda, təbii ki, fərdi qərar verərək bankla əməkdaşlığı dayandıran müştərilər də var. Hər bir müştərinin qərarı onun şəxsi seçimidir və bank həmin qərarları qarşılamağa hazırdır”.
Aynur Nurəliyeva əlavə edib ki, proseslə bağlı məlumatlar aidiyyəti qurumlarla paylaşılır və vəziyyət nəzarət altındadır: “Dünənə olan məlumat bizdə var, bu günün yekun nəticələri üçün isə günün sonunu gözləyirik. Aidiyyəti qurumlara müvafiq məlumatlar təqdim olunur və proses izlənilir. Lakin hazırda bu məlumatları bölüşə bilmərəm”.
