“Ermənistanda baş verən son hadisələr; xüsusilə kilsə təmsilçilərinin həbsi və cəmiyyətin müxtəlif təbəqələrində artan gərginlik Nikol Paşinyanın hakimiyyətinin ciddi sınaq mərhələsinə daxil olduğunu göstərir. Bu, təkcə daxili siyasi böhran deyil, həm də Ermənistanın geosiyasi istiqamətdə qərar verə bilməməsinin nəticəsidir”.

Bu barədə Bizimyol.info xəbər portalına açıqlamasında politoloq Tural İsmayılov bildirib ki, Paşinyan hakimiyyətdən getsə, sülh sazişinin taleyi, təəssüf ki, qeyri-müəyyənlik mərhələsinə düşəcək, çünki Paşinyan bütün təzyiqlərə baxmayaraq, sülhün alternativsizliyini anlayan yeganə erməni liderlərindən biridir.

“Ermənistanda revanşist qüvvələrin, xüsusilə də Rusiyapərəst dairələrin yenidən fəallaşması, sülh prosesinə real təhlükə yaradır. Onlar üçün sülh sənədi, əslində, Ermənistanın müstəqil qərarvermə hüququnun təsdiqi deməkdir. Bu da Moskva üçün “arzuolunmaz ssenaridir”. Elə buna görə də Rusiya yenidən “platforma” təklif etməyə başlayıb. Amma bu platforma, əslində, vasitəçilik adı altında sülhü ləngitmək, regionu yenidən nəzarət altına almaq cəhdidir”-deyən Tural İsmayılov qeyd edib ki, Azərbaycan bu gün artıq heç bir vasitəçiyə ehtiyac duymur və Bakı sülh prosesini birbaşa tərəflər arasında, bərabərhüquqlu, regional sabitlik konsepsiyası əsasında aparmaqda israrlıdır.

“Paşinyanın hakimiyyətdən gedişi sülh xəttini pozmaq, danışıqları yeni xaosa sürükləmək riski yaradar”-deyən Tural İsmayılovun fikrincə, belə bir şəraitdə Ermənistanın gələcəyi, əslində, onun hansı yol seçəcəyindən asılıdır: sülh və inkişaf yolu, yoxsa revanşizm və asılılıq yolu.

“Rusiya platforması bu gün sülh yox, köhnə təsir mexanizmlərinin bərpası deməkdir. Azərbaycan artıq bu oyunun qaydalarını dəyişib. İndi meydanda reallıq var və bu reallıqda qalib Bakı modelidir”-deyə politoloq bildirib.