Yeni Dünya nizamı: Milli dövlətçiliyimizin dərin təməlləri və Böyük Azərbaycan
15-09-2015, 09:07
Avropa Parlamenti Azərbaycanla növbəti qətnamə qəbul etdi. Qətnamədə, Azərbaycanda "söz və vicdan azadlığının pozulduğu, siyasi məhbusların olduğu" haqda absurd iddialar yer alıb.
Xatırladırıq ki, Azərbaycanın bu quruma üzv olduğu dövrdən bu yana, dəfələrlə ölkəmizə qarşı bu tip qərəzlə dolu bir neçə qətnamə qəbul olunub. Mahiyyətinə diqqət yetirildikdə isə qətnamənin sırf ölkəmizin dünyada artan nüfuzuna və möhkəmlənən mövqeyinə zərbə vurmaq məqsədi güddüyü aydın görünür. Bütün demokratik dəyərlərin, söz azadlığının, siyasi partiya və ictimai hərəkatların, qeyri-hökumət təşkilatlarının və müstəqil media qurumlarının fəaliyyəti üçün ən münbit şəraitin yaradıldığı ölkəmizdə siyasi durumun tam əksini göstərən qətnamə, Azərbaycanın həm siyasi dairələrini, həm vətəndaş cəmiyyətinin nümayəndələrini və ictimai fəalları hiddətləndirdi.
Azərbaycanın, dünyanın ən narahat bölgəsində bir təhlükəsizlik adası kimi qalması, iri regional layihələrin əsas təşəbbüskarı və aparıcı ölkəsi olması, beynəlxalq terrorizmlə mübarizədə BMT çərçivəsində üzərinə düşən bütün öhdəlikləri yerinə yetirməsi, Avropanın enerji təhlükəsizliyinin qarantı kimi çıxış etməsi və müstəqil xarici siyasət yürütməsi bəzi qlobal güc mərkəzlərinin regionumuzda apardığı dağıdıcılıq və xaos yaymaq siyasətini pozduğundan, ölkəmizə qarşı çirkin siyasi kampaniyaya start verilib. Azərbaycanda xalqın və vətəndaş cəmiyyətinin böyük dəstəyi ilə ölkəni idarə edən siyasi hakimiyyətin heç bir hegemonluq iddiasında olan böyük dövlətin diktəsini qəbul etməyərək, sırf milli maraqlara uyğun siyasət yürütməsi bu çirkin kampaniyanın əsas səbəbidir. "Parçala, dağıt, hökm sür!" siyasəti ilə öz iqtisadi və hərbi gücündən beynəlxalq hüququ kobudcasına pozaraq istifadə edən Qərb dövlətləri, bütün dünya miqyasında öz xalqlarının formalaşdırdığı hakimiyyətləri yıxaraq planetimizi xaosa sürükləmək kimi çirkin bir oyuna girişiblər.
ABŞ-ın xaos planı və Avropaya axın edən qaçqınlar
"Ərəb baharı" və "Böyük Yaxın Şərq" planı əsasında Avrasiya materikinin böyük bir hissəsini müharibələr ocağına çevirən Qərbin iri kapitalist dövlətrləri artıq öz çirkin niyyətlərini regionun digər nöqtələrində də həyata keçirmək üçün hərəkətə keçiblər. Viran qoyduqları ölkələrdə yüz minlərlə insanın ölümünə, milyonlarla insanın isə evsiz-eşiksiz qalaraq qaçqın vəziyyətinə düşməsinə səbəb olan Qərbin "basdırdığı minalar" öz ayaqları altında partlamağa başlayıb. Dəstəklədikləri radikal silahlı qruplar artıq Qərb dövlətlərinin xüsusi xidmət orqanlarının nəzarətindən çıxmaqdadır. Müharibədən bezmiş, hər şeyini itirmiş ərəb ölkələrinin və Afrika dövlətlərinin sakinləri canlarını götürüb, xoşbəxtliklərini onların bədbəxtlikləri üzərində qurmuş Avropaya axın etməyə başlayıblar. Artıq Avropa ölkələri "Böyük köç"ü xatırladan miqrant axınının qarşısını almaqda çətinlik çəkirlər. Yunanıstana, oradan da Avropanın digər inkişaf etmiş ölkələrinə axın edən qaçqınlar "demokratiyanın beşiyində" heyvani münasibətlə qarşılaşıblar. Bütün dünyanın gözü qarşısında Avropa polisinin və nasistinin vəhşiliyi ilə üzləşən qaçqınlar çarəsiz vəziyyətdə vağzallarda, limanlarda və avtomobil yollarının kənarlarında ac-yalavac, bir tikə çörəyə möhtac yaşamaq uğurunda mübarizə aparmaqdadırlar. Özünün yürütdüyü siyasətin öz maskasını çırdığı Avropa isə yenə öz ampluasındadır; torpaqlarının 20%-i işğal olunmuş, 1 milyon qaçqınını 20 ildir öz gücünə dolandıran Azərbaycana və digər dünya dövlətlərinə "demokratiya dərsi" verir, lakin düz göbəyində baş verən insanlıq faciəsinin heç fərqində belə deyil...
..və ya "hər cür ünsürün düşə biləcəyi" Avropa Parlamentinin qətnaməsinin bir misqallıq çəkisi
Avropa Parlamentinin Azərbaycana qarşı qəbul etdiyi qətnaməyə dövlətin zirvəsindən reaksiya gecikmədi. Dövlət siyasətinin propaqandasından cavabdeh instansiyalar milli media vasitəsi ilə Avropaya növbəti səhvi buraxdığı haqda xəbərdarlıq etdi. Prezidentin ictimai-siyasi məsələlər üzrə köməkçisi Əli Həsənov bu qətnaməni mətbuata verdiyi geniş açıqlamasında detalları ilə şərh edərək, əslində onun arxasında hansı məqsədin güdüldüyünü və hansı qüvvələrin marağına uyğun olduğunu ictimaiyyətə çatdırdı.
"Azərbaycan Prezidenti İlham Əliyevin qəti mövqeyi ondan ibarətdir ki, müasir dövrdə müstəqil siyasi kurs, liberal iqtisadi sistem və güclü vətəndaş cəmiyyəti hər bir ölkənin dinamik inkişafını təmin edən başlıca vasitələrdir. Məhz buna görə də Azərbaycan dövləti demokratik prinsiplərin möhkəmləndirilməsi, vətəndaş cəmiyyəti institutlarının daha da inkişaf etdirilməsi, onların fəaliyyətinin stimullaşdırılması istiqamətində ardıcıl siyasət həyata keçirir", deyə vurğulayan Əli Həsənov, Azərbaycanın müstəqilliyinin əbədi və dönməz olması prinsipinin dövlətimizin tutduğu yolda baş tezis olduğunu bir daha dünyaya bəyan etdi. Cənab Həsənovun dövlət adından verdiyi bu bəyanatda səslənın fikir isə ondan ibarət idi ki, "Bir yox, hətta yüz belə qətnamə də qəbul olunsa, Azərbaycan hakimiyyəti xalqın iradəsinin və milli maraqlarının ziddinə heç bir xarici qüvvə ilə heç bir siyasi bazarlığa girmədən öz müstəqil siyasətini sona qədər davam etdirəcək".
Yeni Dünya nizamı və Milli Dövlətçiliyimizin dərin təməlləri
Yeni dünya nizamına ayaq uyuşdurmağa çalışan Azərbaycan dövləti bütün dünyaya dərin köklər üzərində dayandığını yürütdüyü bütün siyasəti, daxili, xarici, milli və dini siyasəti ilə, tutduğu qətiyyətli mövqeyi ilə göstərməkdədir. Regionun ən strateji və partlayışahəssas nöqtəsinə hakim olan, dərin dövlətçilik tarixinə malik Azərbaycan, yürütdüyü milli maraqlarına uyğun müstəqil siyasəti ilə "gənc Avropa"ya və "vəhşi Qərbə" hər məqamda bu coğrafiyanın əsl sahibinin tarixən kim olduğunu, hansı qədim mədəniyyətin və qəhrəman ulusun davamçısı olduğunu, millətimizlə "ərəblərlə danışılan dildə" danışılmasının böyük və tarixi səhv olduğunu anlatmaqdadır. Xarici siyasətində qardaş Türkiyə ilə strateji siyasi, iqtisadi, hərbi tərəfdaşlığın prioritet təşkil etdiyi milli hökumətimiz açıqdan-açığa xarici düşmənlərimizə onların çirkin niyyətlərinin bizim regionumuzda heç vaxt həyata keçməyəcəyi mesajini verməkdədir. Qərbin "köhnə dünyası" "gənc Avropa"nın müxtəlif siyasi həmlələrinə dövlətin zirvəsindən verilən sərt cavab, daxili işlərimizə "burun soxanların" kimliyindən asılı olmayaraq "burunlarının qırılacağı" bəyanatıdır.
P.S. Bu, birmənalıdır. Bunu hər bir beynəlxalq güc yaxşı dərk etməli və Azərbaycanla danışarkən ritorikasına və bəyanatının tonuna yaxşı diqqət yetirməlidir. Son 20 ilin Azərbaycan siyasəti onu sübut edir ki, dövlətçiliyimizin təməlləri möhkəm bünövrə üzərində qurulub və dövlət idarəçiliyinin sükanı etibarlı əllərdədir. Azərbaycan dövlətçiliyinin kökləri isə 5 minillik milli tariximizin sağlam kökləri üzərində uğurla boy atmaqda, daha da şaxələnərək ulu əcdadlarımızın hökm etdiyi bütün "Böyük Azərbaycan Coğrafiyası"na siyasi və iqtisadi cəhətdən yayılmaqdadır.
Alparslan
Bakuinfo.Az
Geri qayıt