Ermənistan istəməsə, Rusiyanın Gümrüdə hərbi bazası olmayacaq

Ermənistan Gümrüdə yerləşən Rusiya hərbi bazasına ehtiyac olmadığını düşünürsə, Rusiya hərbi kontingentini ölkədən çıxarmağa hazırdır.

Sherg.az xəbər verir ki, bunu Rusiya Prezidenti Vladimir Putin brifinq zamanı bildirib.

“Ermənistan buna hazırdır? Biz heç kimə heç nəyi zorla qəbul etdirmək niyyətində deyilik. Əgər Ermənistan xalqı Rusiyanın hərbi mövcudluğunun davam etməsini istəyirsə, biz qalacağıq”, - Putin deyib.

Rusiya liderinin sözlərinə görə, Rusiya ilə Ermənistan arasında hərbi bazanın gələcəyi məsələsi də daxil olmaqla, ikitərəfli münasibətlərin müxtəlif aspektləri Ermənistanın Baş naziri Nikol Paşinyanla Moskvada keçiriləcək görüşdə müzakirə olunacaq.

Putin bildirib ki, Rusiya və Ermənistan Avrasiya İqtisadi İttifaqı (Aİİ) və Avropa İttifaqı (Aİ) ilə bağlı məsələləri sakit və konstruktiv şəkildə müzakirə etmək barədə razılığa gəliblər. Onun sözlərinə görə, bu məqsədlə Paşinyanı Moskvaya dəvət edib.

Görüşdə əsas müzakirə mövzularından birinin Ermənistanın Aİİ və ya Aİ istiqamətində seçim etməsi olacağı gözlənilir. Bundan başqa, Ermənistandakı dəmir yollarının konsessiyaya verilməsi məsələsi də gündəmdə olacaq.

Putin Ermənistanın Aİİ çərçivəsində fəaliyyətindən əhəmiyyətli iqtisadi üstünlüklər əldə etdiyini bildirib. Onun sözlərinə görə, bu üstünlüklər yalnız enerji daşıyıcılarının qiymətləri ilə məhdudlaşmır.

“Bizi Ermənistan xalqı ilə tarixi dostluq bağları, hətta dostluqdan da daha güclü əlaqələr birləşdirir. Ermənistan xalqı ilə münasibətlərimizin çox dərin kökləri var. Lakin eyni vaxtda iki təşkilatda — Aİİ və Aİ-də olmaq hazırda mümkün deyil. Fit-sanitar normalar, texniki standartlar və digər tələblər bir-biri ilə uyğun gəlmir”, — Putin qeyd edib.

Putin: Ermənistan-Rusiya münasibətlərində problemlər Qarabağ məsələsindən başladı

Rusiya Prezidenti iki ölkə arasında münasibətlərin hazırkı vəziyyətindən danışarkən problemlərin Qarabağ məsələsi ilə başladığını bildirib.

“Keçmişi qurdalamaq istəmirəm, amma hər şey Qarabağ problemi ilə başladı. Ermənistan rəhbərliyi, Baş nazirin özü Praqada müvafiq sənədə imza ataraq Qarabağın Azərbaycanın bir hissəsi olduğunu tanıdı”, — Putin deyib.

Rusiya lideri bunun ardından Moskvanın Qarabağ məsələsində mövqeyinin mürəkkəbləşdiyini bildirib və Rusiyanın Azərbaycanın daxili siyasi məsələlərinə müdaxilə edə bilməyəcəyini vurğulayıb.

Putin: KTMT Ermənistan-Azərbaycan sərhədini “əhatə” edə bilməzdi

Kollektiv Təhlükəsizlik Müqaviləsi Təşkilatına (KTMT) münasibətdə Putin Ermənistan-Azərbaycan sərhədinin delimitasiyası ilə bağlı problemlərə diqqət çəkib.

Onun sözlərinə görə, Paşinyan KTMT-nin sərhədin müəyyən hissələrini qoruma altına almalı olduğunu düşünürdü. Lakin təşkilata üzv digər ölkələr bunun mümkün olmadığını bildiriblər.

“Axı sərhəd delimitasiya edilməyib. Sərhədlə bağlı heç bir müqavilə yoxdur, əvvəllər də olmayıb, indi də yoxdur. Belə vəziyyətdə bu münasibətləri necə qurmalıyıq? Burada həqiqətən ekspert qiymətləndirməsi tələb edən çoxsaylı məsələlər var”, — Putin bildirib.

Xatırladaq ki, Ermənistan 2024-cü ilin fevralında KTMT-də iştirakını “dondurduğunu” açıqlayıb. Baş nazir Nikol Paşinyan bunu Ermənistanın 2021–2022-ci illərdə ölkəyə qarşı kollektiv təhlükəsizlik öhdəliklərinin müttəfiqləri tərəfindən yerinə yetirilmədiyini düşünməsi ilə əlaqələndirib.

2026-cı ilin iyununda Rusiyanın xarici işlər naziri Sergey Lavrov Ermənistanın KTMT-yə üzvlük haqları üzrə borcunun olduğunu bildirərək təşkilatın öhdəliklərini yerinə yetirməyən dövlətlərə qarşı tədbirləri nəzərdə tutan nizamnamə müddəasının tətbiqi məsələsinə baxa biləcəyini açıqlayıb.

Ermənistan Baş naziri Nikol Paşinyan isə daha əvvəl hökumətin beşillik proqramını təqdim edərkən ölkənin KTMT-yə qayıtmaq planının olmadığını bildirib.