İlk tramvay Bakıya nə vaxt qayıdacaq?

Paytaxtın nəqliyyat sistemində illərdir gözlənilən böyük qayıdış üçün hüquqi baza yaradılıb.

Bakı küçələrində yenidən tramvay xətlərinin çəkilməsi və bu prosesin idarə edilməsi konkret bir quruma həvalə olunub.

Ölkə başçısının imzaladığı yeni fərmanla "Bakı Metropoliteni" QSC-nin səlahiyyətləri genişləndirilib.

Artıq bu qurum təkcə metro deyil, həm də tramvay nəqliyyatının təşkili, layihələndirilməsi və tikintisi ilə məşğul olacaq.

Beləliklə, Bakıda tramvay xətlərinin bərpası rəsmən bu qurumun nəzarətinə keçdi.Yəni Bakıda tramvayların yenidən işə düşməsi, xətlərin çəkilməsi və bu nəqliyyatın idarə edilməsi artıq rəsmən "Bakı Metropoliteni"nə tapşırıldı.

Bakıda ilk tramvay xəttinin çəkilişi nə vaxta nəzərdə tutulur?

Məsələ ilə bağlı "Bakı Metropoliteni" QSC-dən “Cebheinfo.az”-a bildirilib ki, 2025–2030-cu illəri əhatə edən Dövlət Proqramında Bakı şəhərində tramvay xəttinin bərpası ilə bağlı xüsusi maddələr qeyd olunub:

“İlkin olaraq Mehdiabad ərazisindən Bakı şəhərinin mərkəzinə müxtəlif alternativ bir-neçə variant müzakirə olunaraq, tramvayın çəkilməsi planlaşdırılır.

Əhalinin sıx məskunlaşdığı və kütləvi ictimai nəqliyyat həllinə çıxışı olmayan ərazilərə tramvayın çəkilməsi ilkin perspektivdə nəzərdə tutulur.

Qarşıdakı dövrdə Bakı tramvayının konseptual planı hazırlanacaq və bu barədə ictimaiyyətə məlumat veriləcək”.