Dünən Gürcüstanda növbəti dəfə dəyəri milyonlarla dollarla ölçülən külli miqdarda narkotik ələ keçirilib.

Gürcüstanın azərbaycandilli Qafqazturk.com saytı ölkənin Daxili İşlər Nazirliyinə istinadən xəbər verir ki, polis əməkdaşları 250 kiloqram heroin müsadirə edib. Narkotik vasitənin “qara bazar”dakı dəyəri təxminən 80 milyon dollar məbləğində qiymətləndirilir.

Aparılan əməliyyat nəticəsində, əvvəllər narkotik cinayətlərinə görə məhkum olunmuş iki Gürcüstan vətəndaşı saxlanılıb. Onlar böyük miqdarda narkotik vasitəni qanunsuz əldə etməkdə, saxlamaqda, Gürcüstana qanunsuz yolla gətirməkdə və ölkədən çıxarmağa cəhddə ittiham olunurlar.

Qanunvericiliyə əsasən, bu cür cinayət əməllərinə görə 20 ilədək və ya ömürlük azadlıqdan məhrumetmə cəzası nəzərdə tutulur.

Qeyd edək ki, narkotik vasitələrin Gürcüstana hansı ölkədən daxil olduğu haqda heç bir rəsmi açıqlama verilmir. Lakin bəzi mənbələr sözügedən narkotikin Azərbaycan vasitəsilə İrandan daxil olduğunu istisna etmirlər. İddialara görə, son vaxtlar Gürcüstanda İran TIR-larına ciddi nəzarət olunduğundan, bu dəfə İrana məxsus yük maşını ilə yalnız ölkəyə daxil olması təmin edilib. Gürcüstandan çıxarılması isə yerli vətəndaşlara həvalə olunub. Lakin, rəsmi mənbələrin də açıqladığı kimi, gürcülər 250 kq narkotiki ölkədən çıxararkən polisə yaxalanıblar.

Onu da oxucuların diqqətinə çatdıraq ki, sözügedən narkotik vasitələr Gürcüstan-Türkiyə sərhədində yerləşən Sarp Keçid Məntəqəsi yaxınlığında aşkar olunub. Bu haqda yerli saytlara açıqlama verən anonim rəsmi mənbənin dediyinə görə, Gürcüstan DİN həmin narkotikin hansı ölkədən daxil olduğunu məqsədli şəkildə bəyan etmir: “Çünki bu kimi hallar ölkələr arasında münasibətlərin korlanmasına gətirib çıxarır. Hansı ki, biz əvvəllər də bir neçə dəfə belə problem yaşamışıq. Bu səbəbdən, narkotikin keçdiyi trafik yox, sadəcə onun mənşəyi haqda informasiya verməklə kifayətlənməli oluruq. Bu maddələrin də İran mənşəli olduğu kimsədə şübhə doğurmur”.

Məlum açıqlamalardan da bəlli olduğu kimi, Gürcüstan xüsusi xidmət orqanları tərəfindən ələ keçirilən 250 kq heroinin Azərbaycan üzərindən ölkəyə daxil olduğuna açıq işarə vurulur. Əslində, “Hürriyyət”ə bu haqda açıqlama verən etibarlı qaynaqlar da sözügedən narkotikin Biləsuvar Gömrük Məntəqəsindən Azərbaycana daxil olduğunu və “Sınıq Körpü” vasitəsilə də ölkədən çıxış etdiyini iddia edirlər. Əlbəttə, bu haqda hələ heç bir rəsmi açıqlama olmadığı üçün, biz bu informasiyanın nə dərəcədə həqiqət olduğunu deyə bilmərik. Amma tezliklə bu və digər suallara cavab verməyə çalışacağıq.

Sonda onu da xatırladaq ki, sentyabrın 27-də içərisində 50 milyon dollarlıq (200 kq) heroin olan İrana məxsus yük maşınının Biləsuvar Gömrük Məntəqsindən daxil olaraq, daha sonra “Sınıq Körpü” Sərhəd Keçid Məntəqəsindən Gürcüstana maneəsiz keçdiyi təsdiq olundu. Bundan sonra gömrük məntəqlərində nəzarət gücləndirilsə də, görünür, hələ də bizim rəsmi qurumlar beynəlxalq narkotik mafiyasının maraqlarından kənara çıxa bilmirlər...

Hurriyyet.az

P.S. Mövzunu davam etdirəcəyik.